Töbike kukwe nebätä: David tä karo ngwen kä ñaka gare ie yekänti. Ju bä jene nibi tuin ie aune ji keta kabre kädekata bä jene yekänti nibi. Niara tä nianinte. Ñongwane ji mada dini kwe jai ye ñaka gari kwe.

Mä David akräke, ¿mäkwe dre nuaindre?

Kukwe keta kabre nuain raba kwe:

1. Ja di kärädre kwe ni madai rabakäre ji metre yebiti.

2. Mapa o jondron ja jie ngwankäre yebiti ja jie ngwandre kwe.

3. Karo mikadre nen jankunu kwe nememe ji kwandre ie.

Kukwe C nuaindre ye ñaka kwin.

Kukwe B ye raba dimike niken ji metre yebiti.

Ye erere arato Biblia raba mä dimike.

Kirabe nükebe ne ngwane tärä bäri ütiäte ye raba mä dimike kukwe nebätä:

• Mäkwe ja tuadre kukwe kri ben angwane raba mä jie ngwen.

• Raba mä mike töbiketari jabätä aune mä töi mike kukwe kwin nuainne.

• Mäkwe nünandre ño bäri kwin ye raba driere mäi.

Nita kite blite angwane bengwairebe nita kite kukwe ngwentari:

• ¿Ñobätä kä kwinta ye bä kore?

• ¿Drebiti muke ye sribebare?

Ye bitikäre, dre tuin nie kä tibienbätä yebätä nita nemen kukwe ngwentari:

• ¿Ñobätä kukwe käme tä nakainkä?

• ¿Ñobätä nita krüte?

¿Biblia tä kukwe ye mike gare ye gare mäi?

Nitre kwati tä niere kukwe kädrieta Bibliabätä ye dätebare kira, tärä ye mekerabe aune ñaka nuäre rükadre gare. ¿Kukwe nieta Bibliabätä ye metre? O ¿kukwe ñaka gare metre nitre ie aibätä tätre ye niere?

Ñodre, Ngöböta kä ne gobraine nitre tä niere, akwa ¿nünanta ño kä nebätä? Nünanta blo, ja tare nikata, nitre tä nemen ulire, bren, nita krüte, nünanta bobre aune kukwe tare tare tä nakainkä, yebe tuin nie kä jökräbiti tibien. Ngöbö ni tarekä raba kukwe ye kwrere mike nemen bare, ¿raba ruin mäi?

¿Nireta kä ne gobraine ye mä törba gai? Biblia tä kukwe ye mike gare ye mä töi mikai ñan krütare.

Nibira gare mäi erere, kukwe nieta mäträkäre tä tikani täräkwata nebätä ye dianinkä Bibliabätä. Biblia ye “Ngöbö Kukwei jökrä abko Ngöbökwe mikani gare metre nitre tärä tikakaye, aisete kukwe ütiäte dirikrä amne kuin mäträkrä amne, kuin ni mda töi diankrä”, ye medenbätä nitre testiko Jehovakwe kräke Biblia ye ja jie ngwankäre aune tö ngwan raba ie (2 Timoteo 3:16, 17). Tärä ye kira, akwa ütiäte kä nengwane yebätä mäkwe ja tötikadre kwinbätä.