Rri oware nọ o be via na: Devidi ọ be dhe omoto kpohọ ẹwho nọ o ri te ẹdẹvo ho. Rekọ nọ ọ be kẹle obei no, o te muẹrohọ nọ eware nọ a kere fihọ esabọdo gbe oghẹrẹ iwou nọ ọ be ruẹ i dhesẹ nọ o vru no. O wọhọ nọ ọ jọ oria jọ dhẹ thọ evaọ edhere na.

Otẹrọnọ whẹ họ Devidi, eme who ti ru?

Whọ sai ru eware esa jọ:

1. Nọ ahwo evaọ edhere.

2. Rri emapo.

3. Gbẹ hae dhẹ vrẹ ọvo, bi rẹro nọ ẹsejọhọ whọ te rọ oghẹrẹ jọ te obonọ whọ be nya na.

O rrọ vevẹ inọ, Orọ C na u wo iruo ho.

Orọ B na u woma vi orọ ọsosuọ na, keme emapo e rrọ owhẹ obọ nọ who bi kpohọ erẹ na, onọ o rẹ kpọ owhẹ evaọ edhere na.

Ebaibol na ọ wọhọ emapo yena!

Ebaibol na ọ rẹ sae

• kpọ owhẹ nọ whọ tẹ be rẹriẹ ovao dhe ebẹbẹ evaọ uzuazọ

• fiobọhọ kẹ owhẹ riẹ kpahe omara gbe epanọ whọ sae rọ jọ emamọ ohwo

• dhesẹ epanọ whọ sai ro yeri uzuazọ nọ o mai woma kpaobọ kẹ owhẹ

Nọ ọmọ ọ tẹ nwane riẹ ẹme ẹta no, o ve mu enọ họ ẹnọ.

• Ẹvẹ ehru na ọ rọ rrọ iburu?

• Eme a ro ru isi na?

Nọ ma tẹ make kpako no, ma rẹ gbẹ nọ enọ kpahe eware nọ e wariẹ omai họ.

• Fikieme eware iyoma e be rọ via?

• Fikieme ahwo a je bi whu?

Kọ who roro nọ ma sae jọ Ebaibol na ruẹ iyo kẹ enọ nana?

Ahwo buobu a rẹ ta nọ iku esia gheghe e rrọ Ebaibol na, inọ u kiekpo no, hayo inọ a rẹ sai wo otoriẹ riẹ vievie he. Kọ Ebaibol na o gine wo ebẹbẹ na, manikọ oghẹrẹ nọ ahwo buobu a bi rri rie? Kọ o sae jọnọ eme nọ ahwo a ta kpahe Ebaibol na o be lẹlẹ ai rri rie ere?

Wọhọ oriruo, ahwo a roro nọ Ebaibol ọ ta nọ Ọghẹnẹ ọ be kpọ iruẹru akpọ na. Kọ ere o ginẹ rrọ? Whaọ akpọ na soso o duwuku! Ebẹbẹ gbe uye-oruẹ e da riẹ fia, uwhu gbe ẹyao, ọbẹwẹ gbe okpẹtu e riẹ. Kọ Ọghẹnẹ oyoyou ọ sae ginẹ wha eware nana ze?

Kọ whọ gwọlọ riẹ iyo enọ nana? Ẹme nọ Ebaibol na ọ ta kpahe ohwo nọ ọ be kpọ iruẹru akpọ na o sai gbe owhẹ unu!

Ẹsejọhọ who muẹrohọ nọ eme nọ e rrọ ibroshọ nana Ebaibol na a rehọ e rai no ze. U mu Isẹri Jihova ẹro inọ Ebaibol na yọ obe nọ a rẹ sai fievahọ, onọ o rẹ sae kpọ ohwo evaọ uzuazọ. O rrọ ere keme “ẹkwoma ẹzi Ọghẹnẹ a ro kere Ikereakere na kpobi, yọ e rẹ kẹ erere nọ a tẹ be rehọ ai wuhrẹ, kẹ ọwhọkuo, kpọ eware vi.” (2 Timoti 3:16, 17) Ma be tuduhọ owhẹ awọ nọ whọ kiẹ Ebaibol na riwi, whọ te ruẹ irere nọ i ti te owhẹ!