ĨKŨLYO YA 10

Mbivilia Ĩtonya Kũndethya Ata?

THAŨKA

NĨKĨ ŨŨ NĨ ŨNDŨ WA VATA?

Mbivilia yaĩtye kana “kĩla Ũandĩko nĩwaveveewe nĩ Ngai.” (2 Timotheo 3:16) Ethĩwa ũndũ ũsu nĩ wa w’o, Mbivilia no yĩũtongoesye kwa nzĩa ĩla yaĩle.

WE ŨTONYA KWĨKA ATA?

Kwasũanĩa ngelekany’o ĩno: Kĩmwana kĩtawa David kyakililye kĩtwaĩte ngalĩ kyeethĩa nĩkyaie. Ĩla kyasiisye nesa vala kĩĩ, kyeethĩie kana kwa w’o nĩkyaie. No nginya vethĩwe ve vandũ kĩsĩile na kyaasya nzĩa.

We wĩka ata keka nue David?

AMBA KŨSŨANĨA!

Vaa ve maũndũ meana ũndũ mũna ũtonya kwĩka:

Kũkũlya nzĩa.
Kũsisya mevu kana ũkatũmĩa indaneti (GPS) nĩ kana ũmanye vala ũĩ.
Kũendeea na savalĩ na ũyĩkwatya kana ũivika vandũ nũũkwata nzĩa.

Kwa w’o, ti laisi kũtetheka na mĩtũkĩ waatĩĩa Ũndũ wa 3.

Waatĩĩa Ũndũ wa 2 nĩ laisi kũtetheka mũno kwĩ ũndũ wa mbee. Mavinda maingĩ mũndũ aendete na ngalĩ ethĩawa na mevu na ethĩawa atonya kũtũmĩa indaneti ĩmũtetheesye kũmanya vala ũũ.

O ta ũu, Mbivilia no yĩũtetheesye!

Vate nzika, ĩvuku yĩĩ yĩthooaw’a mũno no yĩũtetheesye maũndũnĩ aa,

kũũtongoesya ĩla wakwatwa nĩ mathĩna
kũũtetheesya kwĩyĩelewa nesa na ũyĩthĩwa wĩ mũndũ mũseo
kũkwony’a ũndũ ũtonya kwĩka motwi ala maseo thayũnĩ

VALA ŨTONYA KŨKWATA MOSŨNGĨO MA MAKŨLYO MA VATA ALA ANDŨ MEKŨLASYA

Kuma twambĩĩaa kũneena nĩtũkũlasya makũlyo ta:

Nĩkĩ matu methĩawa me ma mbuluu?
Ndata iseũvĩtw’e na kyaũ?

Na ĩla tweana nĩtwambĩĩaa kũkũlya makũlyo ĩũlũ wa maũndũ ala maendeee ĩũlũ wa nthĩ.

Wĩw’a ata ũkamanya kana mosũngĩo ma makũlyo asu onthe me Mbivilianĩ?

Andũ aingĩ maasyaa kana Mbivilia nĩ ĩvuku ya mbano, na nĩyavĩtiwe nĩ ĩvinda, na kana yĩ vinya mũno kũeleeka. Ĩndĩ andũ nĩmo mew’ĩte maũndũ mate ma w’o ĩũlũ wa Mbivilia, kana nĩyo yĩ thĩna? No methĩwe matavĩtw’e maũndũ mate ma w’o?

Kwa ngelekany’o, andũ masũanĩaa kana Mbivilia yaasya kana Ngai nĩwe ũsumbĩkĩte nthĩ. Ĩndĩ ũndũ ũsu ũtonyeka ata? Wasisya nthĩ ĩno yĩ mathĩna maingĩ mũno ta mowau, kĩkw’ũ, woo, ũkya, na mĩisyo! Vatonyeka ata Ngai wĩ wendo akaetee andũ mathĩna asu?

We no wende kũmanya ũla ũsumbĩkĩte nthĩ? Ũsũngĩo ũla wĩ Mbivilianĩ ĩũlũ wa ũla ũsumbĩkĩte nthĩ no ũtume ũseng’a mũno!

Nĩvatonyeka ũkethĩwa wonie kana motao ala me mbulosuanĩ ĩno maumĩte Mbivilianĩ. Ngũsĩ sya Yeova iyĩthĩawa na nzika kana Mbivilia nĩyo ĩtongoeasya andũ nesa. Iĩkĩĩaa ũu nũndũ Mbivilia ‘nĩyaveveewe nĩ Ngai, nayo nĩyaĩle kwa kũmanyĩsya, na kũĩkĩĩthya andũ mavĩtyo, na kũmatũngĩĩa.’ (2 Timotheo 3:16, 17) Nĩwaĩle kũsoma ĩvuku yĩĩ, o na kau yaandĩkiwe ĩvindanĩ ya tene, ũĩ wayo nũtũmĩkaa ũmũnthĩ!