សំណួរទី១០
តើគម្ពីរអាចជួយខ្ញុំយ៉ាងដូចម្ដេច?
តើប្អូននឹងធ្វើយ៉ាងណា?
សូមស្រមៃគិតអំពីរឿងនេះ: បុរសម្នាក់ឈ្មោះដាវីឌកំពុងបើកឡានក្នុងតំបន់មួយដែលគាត់មិនស្គាល់សោះ។ គាត់មើលសញ្ញាផ្សេងៗនៅលើផ្លូវ សញ្ញានោះបង្ហាញថានេះមិនមែនជាកន្លែងដែលគាត់ចង់ទៅទេ។ ឥឡូវដាវីឌដឹងច្បាស់ថាគាត់វង្វេងផ្លូវហើយ។ គាត់ទំនងជាបានបត់ទៅផ្លូវខុសពេលធ្វើដំណើរ។
បើប្អូនជាដាវីឌ តើប្អូននឹងធ្វើយ៉ាងណា?
គិតមុនគូរ!
ប្អូនមានជម្រើសខ្លះៗ:
-
ក. សួរផ្លូវគេ។
-
ខ. មើលផែនទី ឬប្រើប្រព័ន្ធGPS។
-
គ. បន្តធ្វើដំណើរដោយសង្ឃឹមថានឹងអាចរកផ្លូវឃើញ។
ចម្លើយ គ គឺមិនសូវមានប្រយោជន៍ទេ។
ចម្លើយ ខ មានប្រយោជន៍ច្រើនជាងចម្លើយ ក។ ហេតុអ្វី? ពីព្រោះផែនទី ឬប្រព័ន្ធGPS អាចជួយនាំផ្លូវប្អូនរហូតដល់ទិសដៅ។
ស្រដៀងគ្នាដែរ គម្ពីរអាចជួយណែនាំប្អូនបាន!
គម្ពីរដែលជាសៀវភៅលក់ដាច់បំផុតអាច
-
ណែនាំប្អូនឲ្យចេះដោះស្រាយបញ្ហាក្នុងជីវិត
-
ជួយប្អូនឲ្យស្គាល់ខ្លួនឯង ព្រមទាំងជួយប្អូនឲ្យក្លាយទៅជាមនុស្សប្រសើរជាង
-
បង្ហាញប្អូនឲ្យស្គាល់អំពីរបៀបរស់នៅដែលមានន័យខ្លឹមសារ
ចម្លើយចំពោះសំណួរអំពីជីវិត
ពេលយើងចេះនិយាយ យើងសួរសំណួរច្រើន ដូចជា
-
ហេតុអ្វីមេឃពណ៌ខៀវ?
-
តើផ្កាយធ្វើពីអ្វី?
ក្រោយមកពេលយើងធំឡើង យើងចាប់ផ្ដើមសួរសំណួរដែលទាក់ទងនឹងជីវិត ដូចជា
-
ហេតុអ្វីមនុស្សស្លាប់?
ចុះយ៉ាងណាបើចម្លើយចំពោះសំណួរទាំងនោះមានក្នុងគម្ពីរតាំងពីយូរហើយ?
មនុស្សជាច្រើននិយាយថាគម្ពីរគឺជាសៀវភៅរឿងព្រេងឬរឿងនិទាន ជាសៀវភៅហួសសម័យ ហើយពិបាកយល់។ ប៉ុន្តែ តើអ្វីដែលពួកគេនិយាយជាការពិតឬ? ឬក៏ព័ត៌មានដែលពួកគេបានឮអំពីគម្ពីរគឺខុសពីការពិត?
ជាឧទាហរណ៍ មនុស្សខ្លះគិតថាគម្ពីរប្រាប់ថាព្រះជាអ្នកគ្រប់គ្រងពិភពលោកនេះ។ ប៉ុន្តែ តើព្រះពិតជាអ្នកគ្រប់គ្រងមែនឬ? សូមគិតទៅមើល ពិភពលោកនេះពោរពេញទៅដោយការឈឺចាប់ ទុក្ខវេទនា ជំងឺ ភាពក្រីក្រ មហន្តរាយ និងសេចក្ដីស្លាប់។ ដូច្នេះ បើព្រះដែលប្រកបដោយសេចក្ដីស្រឡាញ់ជាអ្នកគ្រប់គ្រងពិភពលោកនេះ តើលោកបណ្ដាលឲ្យមានរឿងទាំងអស់នេះកើតឡើងទេ?
តើប្អូនចង់ដឹងចម្លើយទេ? ចម្លើយក្នុងគម្ពីរអំពីអ្នកណាជាអ្នកគ្រប់គ្រងពិភពលោកនេះ ប្រហែលជាធ្វើឲ្យប្អូនភ្ញាក់ផ្អើល!
ប្អូនទំនងជាបានកត់សម្គាល់ហើយថាយោបល់ផ្សេងៗក្នុងសៀវភៅនេះមានមូលដ្ឋានលើគម្ពីរ។ សាក្សីព្រះយេហូវ៉ាជឿជាក់ថាគម្ពីរមានការណែនាំដ៏គួរឲ្យទុកចិត្ត។ នេះគឺដោយសារគម្ពីរ«បានត្រូវសរសេរក្រោមការដឹកនាំរបស់ព្រះ ហើយមានប្រយោជន៍សម្រាប់បង្រៀន កែតម្រង់ ធ្វើឲ្យត្រឹមត្រូវឡើងវិញ»។ (ធីម៉ូថេទី២ ៣:១៦, ១៧) ដូច្នេះ ប្អូននឹងទទួលប្រយោជន៍ច្រើន បើប្អូនសិក្សាគម្ពីរចាស់បុរាណតែទាន់សម័យនេះ!