Fwanyikizha bino: David ubena kwendesha motoka mu mukwakwa ye abula kuyuka bulongo. Bipachi biji munsa ya mukwakwa ne biyukilo bikwabotu byamumwesha’mba mpuzha koaji kechi ko ko aji kufwainwa kuya ne. Po po amona kuba’mba walubilamo. Waji kuchimpukila mu mukwakwa ungi.

Umvwe yobe wajinga David, inge waubile byepi?

Kuji bintu byavula byo wakonsha kusalapo:

1. Kwipuzha bantu amba bakubuule ko ukeba kuya.

2. Kutajisha pa mapu wa pa pepala nangwa pa kompyuta.

3. Kutwajijilatu kwendesha ne kuketekela’mba usakutana jishinda kulutwe.

Kulondela jishinda ja busatu kechi kwakonsha kukukwasha ne.

Bino jishinda ja bubiji jawama. Kutajisha pa mapu kwawama mambo mapu usakwendangatu nanji konse ko ubena kuya.

Baibolo naye byo byo akonsha kukukwasha.

Uno buku waya bingi nkuwa wakonsha

• kukutangijila mu makatazho onse a mu bwikalo

• kukukwasha kuyuka bulongo byo uji ne kwikala muntu wawama

• kukumwesha byo wakonsha kwikala bwikalo bwawama

Tutatulatu kwipuzha mepuzho inge twafundatu kwamba.

• Jiulu jaikela ka kifufya?

• Nga tubangabanga betulengele byepi?

Inge twakomako, tutendeka kwipuzha pa bimweka mu ntanda.

• Mambo ka o kwaikela bubi?

• Mambo ka bantu o bafwila?

Mwakonsha kuba byepi inge mwayuka’mba ano mepuzho akumbulwa mu Baibolo?

Bavula bamba’mba, mu Baibolo muji bya kusombatu ne bishimi kwapwa, muji bya kala, nangwa’mba kyakatazha bingi kukwatakanya bijimo. Kukwatakanya biji mu Baibolo ko kwakatazha nyi, inyi bantu byo bayuka’mba biji mu Baibolo byo bilengela? Nanchi bintu byo bayuka pa Baibolo bya kine nyi?

Kya kumwenako, bantu balanguluka’mba Baibolo waamba’mba Lesa ye ubena kulama ntanda. Kyaikela ka byobyo? Ino ntanda yaluwankana. Mwavula bingi misongo ne kuyanda, bikola ne lufu, nzala ne bya malwa. Pano nga Lesa witutemwa wakonsha kwituletela byepi bya malwa?

Nanchi ukeba kuyuka mukumbu nyi? Wakonsha kukumya bingi inge waumvwa byaamba Baibolo pa ubena kulama ino ntanda.

Byonka byo twamona, byambo biji mu uno buloshuwa byafuma mu Baibolo. Bakamonyi ba kwa Yehoba bashiinwa’mba mu Baibolo mo muji mafunde awama a kwitutangijila. Mambo ‘binembelo byonse byanembelwe na lutangijilo lwa mupashi wa Lesa kabiji bikwasha bantu pa kwibafunjisha, pa kwibakajipila, ne pa kwibololako.’ (2 Timoti 3:16, 17) Ukamwenamo bingi inge keutange Baibolo, buku wanembelwe kala bino wingila ne mu ano moba.