KWƐSTYƆN 10

Aw di Baybul Go Ɛp Mi?

PLE

WETIN MEK DIS KWƐSTYƆN IMPƆTANT?

Di Baybul se “na Gɔd tɛl pipul ɔltin we rayt nain Buk.” (Sɛkɛn Lɛta To Timoti 3:16) If na so i bi, di Baybul go gi yu di advays we yu nid.

WETIN YU GO DU?

Tink bɔt dis: Devid de waka na wan vilej na nɛt ɛn di ples rili dak. Bikɔs di ples dak, i nɔ de si usay i de go. Devid kam no se i dɔn lɔs. I go dɔn bɛn ɔ pas sɔnsay we i nɔ fɔ pas we i de waka.

If yu na bin Devid, wetin yu go du?

STƆP ƐN TINK!

Yu gɛt bɔku tin we yu kin disayd fɔ du:

Aks pɔsin fɔ sho yu di rod.
Yuz tɔchlayt.
Kɔntinyu fɔ waka ɛn op se sɔntɛm yu go si usay yu de go.

If yu disayd fɔ du dis las wan, i nɔ go ɛp yu tumɔs.

Di sɛkɔn wan bɛtɛ pas di fɔs wan, bikɔs di tɔchlayt go de na yu an we yu de waka, ɛn i go ɛp yu fɔ si usay yu de go.

Di Baybul go ɛp yu dis sem we!

Dis buk we de sɛl pas ɔl ɔda buk dɛn go

ɛp yu we yu gɛt prɔblɛm
ɛp yu fɔ lan bɔt yusɛf ɛn bi bɛtɛ pɔsin
sho yu aw fɔ liv yu layf di bɛst we

DI BAYBUL GƐT ANSA TO IMPƆTANT KWƐSTYƆN DƐN WE WI KIN AKS

Frɔm di tɛm we wi bigin tɔk, wi kin aks kwɛstyɔn dɛn lɛk:

Usay di skay ɛnd?
Wetin mek di sta dɛn de shayn?

Leta wi kin bigin fɔ aks kwɛstyɔn bɔt di wɔl we wi de insay.

Wetin mek bad tin dɛn de apin?
Wetin mek pipul dɛn de day?

Fɔ se di ansa dɛn bin dɔn de na di Baybul ɔl dis tɛm?

Bɔku pipul dɛn kin se di Baybul na soso stori, i dɔn kɔmɔt na stayl, ɔ i tu at fɔ ɔndastand. Bɔt na di Baybul rili gɛt di prɔblɛm, ɔ na wetin pipul dɛn dɔn yɛri bɔt di Baybul? Fɔ se wetin dɛn yɛri nɔto tru?

Fɔ ɛgzampul, pipul dɛn tink se di Baybul se na Gɔd de kɔntrol di wɔl. Bɔt aw dat go bi we di wɔl nɔ gɛt wan kɔntrol? Pipul dɛn de fil pen ɛn sɔfa, dɛn de sik ɛn day, pipul dɛn po ɛn bɔku ɔda bad bad tin dɛn de apin. Aw Gɔd we lɛk wi go mek ɔl dɛn tin ya de apin?

Yu go lɛk fɔ no di ansa? Di tin we di Baybul se bɔt di pɔsin we de kɔntrol di wɔl go sɔprayz yu!

Sɔntɛm yu go dɔn notis se di advays we de insay dis buk kɔmɔt na di Baybul. Jiova Witnɛs dɛn biliv se di Baybul na di bɛst buk we go sho wi aw fɔ liv wi layf di rayt we bikɔs “na Gɔd tɛl pipul ɔltin we rayt nain Buk, ɛn ɔl dɛn tin de gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt.” (Sɛkɛn Lɛta To Timoti 3:16, 17) Yu rili nid fɔ stɔdi dis ol buk we de stil bɛnifit wi tide!