Yiyaŋndɔ a taamaseliiyo hoo. Deeve cho kɔlaŋ o sɔndɔkɔlɔɔ o nyumma bɛndu bɛnduaŋ niŋ. Le mɛɛ nyumndaŋ ma tol kpiŋgbi yɛ, o nɔla mbo che nyɛ teŋgaa le. Mbo sina maa o bendu nɛiyo. Kɛlɛŋgaa nɛi cheleŋ o tol kɔɔli ni le kɔlaŋ.

Te ndoo yɔŋ pɛ aa num cho Deeve ni, yɛɛ ŋ wa yɛ tosa?

A nɔ chuaŋ chualaŋ tau:

1. Nyuna le nɛi kpeekpeiyo.

2. Soliŋ tɔɔsoo kpeku.

3. Hiou lachi a kɔlaŋ, kɛlɛŋgaa a cho nɛiyo saalɔŋ.

Kɛlɛŋgaa, Chuaŋ Chua 3 cho Chuaŋ Chua mɛɛlaa ŋ tosa wo ni.

Chuaŋ Chua 2 hiou bɛnda a o tasoo. Nduyɛ pɛɛŋ, tɔɔsoo nɔ mbo wa num o ba le num nɛiyo chɔmndo haaa ma fuuluu naa ŋ cho kɔlaŋ nda.

Baabuiyo nɔla mbo mala num o nɛi waa naa choo!

Yau kɛndɛ bɛndoo hoo nɔla mbo

• manda num a bahawɛilaŋ o yoomoo niŋ

• mala num ma pɛɛku a numpila okɔɔ nduyɛ ma simnuŋ wana sɔviɔɔ

• chɔm num mɛɛ ŋ looku ma sɔla yoomu sɔviɔɔ yɛ

Te ŋ kandu pɛ suɛi chaa, ŋ kandu nyuuniaalaŋ aa,

• Nɛɛ toosiaa yɛ choo choo?

• Nɛɛ toosiaa yɛ looŋ?

Te nyɔɔ viou pɛ kpɛɛ, ŋ kandu nyuuniaalaŋ a chieeŋndo okɔɔ.

• Le yɛɛ sɔɔŋ wɔɔŋndoŋ yɔŋnuŋ yɛ?

• Le yɛɛ waŋchieeya wu yɛ?

Te o yɔŋ yɛ maa mulilaŋ le nyunalaŋ ndaŋ la cho niŋ o Baabuiyo niŋ lɔɔ levil?

Wanaa bɔɔbɔɔ dimi maa yau ŋbundɔɔ Baabuiyo cho ni. Nduyɛ maa o cho yau paandu le naa, maa o kendu bɔɔ bila biyɔɔ. Kɛ baa Baabuiyo nɔ bahawɛiyo ni? Ɔɔ yiyaŋ waŋnda chieeya nɔ a ndu okɔɔ wo? Baa a sɔla muli sɔvɛ le?

Le taamaseliiyo, wanaa bɔɔbɔɔ yiyaŋ maa Mɛlɛka chieeŋndo hoo cho hau o ba bɛŋgu ni. Vɛɛ hei wa yɛ tonya? Chieeŋndo hoo hiou ba a wɔuleŋ! O cho o piaa cha a nyɛ nyɛpalaa, saŋgaa, naalaŋ, piɔmndaŋ, bala fondolaŋ vɛlɛ a kpundɛlaŋ. Vɛɛ Mɛlɛka nɔ kaalaa wo tosa yɛ sɔɔŋ wɔɔŋ waa naa kpou?

A yeema pa ma sina mulioo? Kɔndɔfillo cho num biyɔɔ le nyɛ Baabuiyo dimi a wana chieeŋndo hoo cho o ba bɛŋgu wo!

Naapum, a che maa sila cho o yauwo hoo niŋndo tɔlnuŋ o Baabuiyo choo. Seiyaa Chɛhowaa laalaŋ maa Baabuiyo cho puundule nɛi chɔmaa ni. Kanifuule ‘nyina Mɛlɛkaa tosa ni ma poonyiaa laŋ. Nduyɛ, la cho diomnda nɔ malaa leniŋ. Kani fuule, la cho le waŋnda tonya cho a Mɛlɛka okɔɔ wo pɛɛkoo. La cho le pɛɛkula lachoowalaŋ chɔɔmuuwo, nduyɛ, la cho vɛlɛ le waŋnda miŋgioo o nɛi.’ (Timoti Diiŋ Ndɔɔ 3:​16, 17) Numpila nɔ ni ma yaasiaa yau paandoo hoo, mbo wa vɛlɛ yau sɛnɛi le naa wo!