ဆိကမိၣ်​ကွၢ်​တၢ်ဂ့ၢ်​အံၤ​တက့ၢ်– ဖဲ ဒ့ဘ့း နီကါ​အခါ အဝဲ​နုာ်လီၤ​ဘၣ်​ဝဲ​ကျဲ​လၢ​အ​ကမၣ်​တတီၤတီၤ ဒီး​လဲၤ​တုၤ​ဝဲ​ဆူ​တၢ်လီၢ်​တတီၤ​လၢ အ​တ​လဲၤ​ဘၣ်​ဝဲ နီတဘျီ​ဘၣ်. အဃိ ဖဲ​အဝဲ​ကွၢ်ဝဲ​ကျဲ​တၢ်​ပနီၣ်​ဒီး တၢ်လီၢ်​တၢ်ကျဲ​လၢ​ကျဲ​ကပၤ​အခါ အဝဲ​သ့ၣ်ညါ​လီၤအသး​လၢ အ​ဟးဖျိး​ကျဲ​လံ.

န​မ့ၢ်​အိၣ်ဘၣ်​လၢ ဒ့ဘ့း အလီၢ်​န့ၣ်​န​က​မၤ​ဒ်လဲၣ်.

န​တၢ်​ဃုထၢ​အိၣ် အါန့ၢ်ဒံး​တခါ​လီၤ–

1. က. သံကွၢ်​ပှၤလၢ​အ​အိၣ်​ဖဲ​န့ၣ်​တဖၣ် ဒ်သိး​က​နဲၣ်​န​ကျဲ.

2. ခ. ကွၢ်​ဟီၣ်ခိၣ်ဂီၤ မ့တမ့ၢ် GPS.

3. ဂ. ဆဲး​နီကါ​ဆူညါ, ဘၣ်​သ့ၣ်​သ့ၣ် လၢ​တၢ်​တ​ပာ်သူၣ်​ပာ်သး​အ​ပူၤ န​က​ထံၣ်န့ၢ်က့ၤ​ကျဲ​လၢ​အဘၣ်​တဘိ​လီၤ.

န​မ့ၢ်​မၤ​ပိာ်ထွဲ​တၢ်​ဃုထၢ (ဂ) န့ၣ် ဘၣ်​သ့ၣ်​သ့ၣ် တ​ကဲထီၣ်​ဘၣ်.

မ့မ့ၢ်​တၢ်​ဃုထၢ (ခ) န့ၣ်​ဂ့ၤဒိၣ်​န့ၢ်ဒံး တၢ်​ဃုထၢ (က) လီၤ. ဘၣ်​မနုၤ​အဃိ​လဲၣ်. မ့ၢ်​လၢ​ဟီၣ်ခိၣ်ဂီၤ မ့တမ့ၢ် GPS န့ၣ်​က​မၤစၢၤ​နၤ​လၢ န​တၢ်​လဲၤ​ကျဲ​ဒီတကတီၢ်, ဒ်သိး​န​သု​တ​ဟးဖျိး​ကျဲ​တဂ့ၤ​အဂီၢ်​လီၤ.

ဒ်​န့ၣ်​အသိး လံာ်စီဆှံ​စ့ၢ်ကီး​ကဲထီၣ်​တၢ်မၤစၢၤ​လၢ န​တၢ်အိၣ်မူ​ဒီတကတီၢ်​သ့ဝဲ​လီၤ.

လံာ်စီဆှံ​တဘ့ၣ်​အံၤ က​မၤစၢၤ​နၤ​ဒ် တၢ်ဂ့ၢ်​လၢ​လာ်​တဖၣ်​အံၤ​ပာ်ဖျါ​ထီၣ်ဝဲ​အသိး​လီၤ

• မၤစၢၤ​နၤ​လၢ န​လဲၤခီဖျိ​န​တၢ်အိၣ်မူ အ​တၢ်ကီ​တၢ်ခဲ​က​သ့​အဂီၢ်

• မၤစၢၤ​နၤ​လၢ န​က​ကဲထီၣ်​ပှၤလၢ​အဂ့ၤ​တဂၤ

• ဒီး​မၤစၢၤ​နၤ​လၢ န​ကအိၣ်​ဒီး​တၢ်အိၣ်မူ​လၢ အ​လီၤ​သူၣ်မံ​သးမုာ်​အ​ဒိၣ်ကတၢၢ်​လီၤ

ဖဲ​ပ​တဲတၢ်​သ့​ထီၣ်​အခါ, ပ​သံကွၢ်​တၢ်​လီၤ.

• ဘၣ်​မနုၤ​အဃိ မူခိၣ်​လါ​လဲၣ်.

• ဆၣ်​တဖၣ် ဘၣ်​တၢ်တ့​လီၤ​အီၤ​လၢ တၢ်မနုၤ​လဲၣ်.

ဒီး​ဖဲ​ပဒိၣ်​ထီၣ်​အခါ ပ​သံကွၢ်​တၢ် ဘၣ်ဃး​ဒီး​ဟီၣ်ခိၣ်​အ​တၢ်အိၣ်သး​လီၤ.

• ဘၣ်​မနုၤ​အဃိ တၢ်အၢ​တၢ်သီ​အိၣ်​ထီၣ်ဝဲ​လဲၣ်.

• ဘၣ်​မနုၤ​အဃိ ပှၤ​ဟီၣ်ခိၣ်​ဖိ​ဘၣ်​သံဝဲ​လဲၣ်.

တၢ်​သံကွၢ်​တဖၣ်​အံၤ အ​တၢ်​စံးဆၢ​န့ၣ်​အိၣ်ဝဲ​လၢ လံာ်စီဆှံ​အ​ပူၤ​လီၤ.

ပှၤ​အါဂၤ​တဲဝဲ​လၢ လံာ်စီဆှံ​အံၤ​လီၤဂာ်​ဒ်သိး​ဒီး ပူ​ကလီ​ကလီ​လီၤ. မ့ၢ်​လံာ်​လၢ​အဘျုး​တအိၣ်​လၢ စိၤ​ခဲအံၤ​လၢၤဘၣ်, ဒီး​ကီ​လၢ​ပ​က​နၢ်ပၢၢ်​အီၤ​လီၤ. ဘၣ်ဆၣ် တၢ်​လၢ​ပှၤ​တဲဝဲ​တဖၣ်​အံၤ မ့ၢ်​အဘၣ်​စ့ၢ်ကီး​ဧါ, မ့တမ့ၢ် မ့ၢ်​အဝဲသ့ၣ်​နၢ်ဟူ​ကမၣ်​လံာ်စီဆှံ​အဂ့ၢ်​ဧါ.

အဒိ ပှၤ​ဆိကမိၣ်​လံာ်စီဆှံ​တဲဝဲ​လၢ ကစၢ်​ယွၤ​ပၢ​ဟီၣ်ခိၣ်​လီၤ. ဘၣ်ဆၣ် မ့ၢ်​အဝဲသ့ၣ်​အ​တၢ်​ဆိကမိၣ်​န့ၣ် ဘၣ်​ဝဲ​ဧါ. ဟီၣ်ခိၣ်​အ​တၢ်အိၣ်သး အၢ​သီ​ဝဲ​ဒိၣ်မး​အဃိ ပ​တဲ​လၢ​ကစၢ်​ယွၤ​ပၢ​ဟီၣ်ခိၣ်​န့ၣ်​က​သ့ဧါ. ဟီၣ်ခိၣ်​တဘ့ၣ်​အံၤ အိၣ်​ပှဲၤ​ဒီး​တၢ်သူၣ်အုး​သးအုး, တၢ်နး​တၢ်ဖှီၣ်, တၢ်ဆူး​တၢ်ဆါ, တၢ်သံ, တၢ်ဖှီၣ်​တၢ်ယာ်​ဒီး​တၢ်​ဘၣ်ဒိ​ဘၣ်ထံး​လၢ န့ဆၢၣ်​အဃိ​လီၤ. ကစၢ်​ယွၤ​လၢ​အပှဲၤ​ဒီး တၢ်အဲၣ်​တၢ်ကွံ​န့ၣ် က​ဒုးအိၣ်​ထီၣ်ဝဲ​တၢ်​သ့ၣ်​တဖၣ်​အံၤဧါ.

မ့ၢ်​န​အဲၣ်ဒိး​သ့ၣ်ညါ တၢ်​သံကွၢ်​တခါ​အံၤ အ​တၢ်​စံးဆၢ​ဧါ. မ့ၢ်မတၤ​တဂၤ​ပၢ​ဟီၣ်ခိၣ်​လဲၣ်န့ၣ် လံာ်စီဆှံ​အ​တၢ်​စံးဆၢ ဒုး​ကမၢ​ကမၣ်​နၤ​သ့ဝဲ​လီၤ.

န​က​ပာ်သူၣ်​ပာ်သး​လၢ လံာ်​တဘ့ၣ်​အံၤ အ​တၢ်ဟ့ၣ်ကူၣ်​န့ၣ် ဒိးသန့ၤ​ထီၣ်​အသး​လၢ လံာ်စီဆှံ​အ​ပူၤ​လီၤ. ယဟိဝၤ​ပှၤအုၣ်​အသး​တဖၣ် နာ်ဝဲ​နီၢ်နီၢ်​လၢ​လံာ်စီဆှံ​န့ၣ် မ့ၢ်​လံာ်​အဂ့ၤ​ကတၢၢ်​တဘ့ၣ်​လၢ က​ဟံးစု​နဲၣ်ကျဲ​ပှၤလီၤ. လံာ်စီဆှံ​တဲဝဲ​လၢ “ကယဲၢ်​တၢ်ကွဲး​အသး​ခဲလၢာ်​န့ၣ်, ကွဲး​အသး​လၢ​ယွၤ​အသး​စီဆှံ, ဒီး​ဂ့ၤ​လၢ​သိၣ်​တၢ်သီ​တၢ်​အဂီၢ်, လၢ​သိၣ်ဃီၣ်​တၢ်​အဂီၢ်, လၢ​ဃၣ်လိၤ​တၢ်​အဂီၢ်, လၢ​သိၣ်လိ​နဲၣ်လိ​တၢ်” အဂီၢ်​လီၤ. (၂ တံၤမသ့း ၃:၁၆, ၁၇) န​လံာ်စီဆှံ​မ့ၢ်​အိၣ်​န့ၣ် ဃု​သ့ၣ်ညါ​အီၤ​လီၤတံၢ်​လီၤဆဲး​တက့ၢ်. ဒီး​က​ကဲဘျုး​ကဲဖှိၣ်​လၢ​နဂီၢ်​လီၤ.