Alakanyeni pali cici: David alukwensha motoka ku mupunda woyo teshipo bwino. Utwishibilo utuli mu musebo tulukulangisha lukoso ati talipo eko elelwe ukuba ilya mpindi. Dafidi aishiba ati aluba. Cipale acipaasukila mu nshila imbi pa lwendo lwakwe.

Kani emwe mwali Dafidi, mungacita shani?

Kuli ifi mungasalululapo ukucita:

1. Mungepusha kulya kwenka.

2. Mungalolesha pali mapu, neli mungapyungisha GPS (COMPUS).

3. Mungapitilisha ukwensha, ili mucetekele ati cipale mungasangana inshila ya kwenu.

Muli bucine, C eimungapelako ukusalululapo.

Ica bubili cawamapo na pa cakutanga. Pakuti, mapu neli GPS mulaba nayo pa lwendo, ne kulukumulangisheni umu mwelelwe ukuya.

Baibolo ingamofweniko mu nshila intu imo!

Ili ibuuku-ilishibikilwe makosa

• lingamubuuleni ifyakucita ili mwaba ne makatasho

• lingamofweniko ukwishiba bwino ifi muli na fyefyo mungawamyako imibelo yenu

• lingamulangisheni ifi mungacita pa kuba ne mekalilo aaweme

Ukufuma lukoso ili twatatika ukulabila, tulepusha ifyakwipusha.

• Kani icalo cilipelele pi?

• Kani utubangabanga tulaba kwisa impindi ya kasuba?

Ili twakula tulatatika ukwipusha pa ficitika mu calo twikala.

• Nindo ifintu ifibipile ficitikila?

• Nindo abantu bafwila?

Nga kani ifyasuko kuli fyefyo ifyakwipusha emo fili muli Baibolo yonse iyi impindi?

Abantu abengi balalabila ati Baibolo ilalabila lukoso pa fyakale, ifipitile, ati taipyungapo pali bukumo, neli ati ikateshe ukumfwa. Pano kani fyacine ni Baibolo eikwete ubukatasho, neli ni fyefyo abantu bomfwile pali Baibolo? Kani baalibabuulile ifya bufi?

Ku cakubwenako, abantu balalanguluka ati Baibolo ilalabila ati baLesa e bekalika icalo. Pano cingaba shani ifyo? Ifintu mu calo filibipile! Muli ukusomenwa ne kupenga, ukulwala ne kufwa, insala ne fitulika. Kani baLesa ba butemwe bangalengesha shani ifyakube’fi ukucitika?

Mungatemwa ukwishiba icasuko? Ifi Baibolo ilabilepo pa wikalika icalo fingamukankamikeni!

Cipale mwacibona ati ukufunda ukuli muli ino bloshuwa kwafuma mu Baibolo. Bamboni sha BaYawe balisumiine ati Baibolo libuuku umusangwa ukufunda uku tungacetekela. Ni pakuti Baibolo ‘ilifumine kuli baLesa kabili ilyelelwe ukusambisha, ukucenjesha, ne kulunjika.’ (2 Timote 3:16, 17) Mulyelelwe ukulukupenda ili ibuuku—lya kale—ilipyunga na bukumo!