Ũthũgaania: David etithĩtie ngaarĩ gũntũ kũgeni kĩrĩ we. Ndwano cia barabara na cia gũntũ kũrĩa arĩ, irĩonania naarĩa arĩ tĩ ku akũbatara kwĩthĩrwa arĩ. David akagutũka naũrĩte. No mwanka kwĩthĩrwe kũrĩ o ateere njĩra rũgendone rwawe.

Ũrĩngĩĩthĩrwa nĩgwe David ũrĩngĩthithia atĩa?

No ũthithie bũmwe bwa mantũ jaja:

1. Ũũrie njĩra.

2. Ũtege mapu, kana ũtumĩre gĩntũ gĩa kũmenyithia muntũ nĩkũ arĩ (GPS).

3. Wĩte na mbere gwĩtithia ngaarĩ wĩrĩgĩĩrĩte mbuga ũkoona njĩra.

Ũntũ bwa jathatũ no bũgũteethie, ĩndĩ bũũkai.

Nĩ kaaba ũntũ bwa jaĩrĩ nkũrũki ya bwa mbere. Tontũ ũkeethĩrwa na mapu kana GPS rũgendone runthe, ĩgĩgũtongagĩĩria.

Bibiria no ĩgũteethie na njĩra o ta ĩu!

Bibiria tayo iuku rĩrĩa rĩĩthagĩrwa na antũ babaingĩ nkũrũki ya jonthe, yoomba

• gũgũtongeeria ũtũũrone rĩrĩa kwĩna mathĩĩna

• gũgũteethia kwimenya na kwaa muntũ ũmwega nkũrũki

• gũkwonia ũrĩa ũũmba kwĩthĩrwa na ũtũũro bũbwega buru

Kuuma twamenya kwaria, nĩ tũũragia biũria.

• Nĩkĩ ĩgũrũ rĩrĩ rĩa rangi ya bruu?

• Njota ithithĩtue nambi?

Nyumene, nĩtwambagia kũũria biũria biegie mantũ jarĩa jatũthiũrũnkĩte.

• Nĩkĩ mantũ jamathũũku jakarĩkaga?

• Nĩkĩ antũ bakuujaga?

A gũkeethĩrwa ĩgiita rĩu rĩonthe macookio nĩjethĩrĩtwe jarĩ Bibiriene?

Antũ babaingĩ baugaga atĩ Bibiria nĩũjũrĩte ngono cia kũthũgaanĩrua na itĩ cia mma, atĩ nĩkũrũkĩtwe nĩ ĩgiita kana nĩ bũbũũmũ mono gũciũkĩrwa nĩyo. Ĩndĩ-rĩ, Bibiria nĩyo ĩrĩ na thĩĩna? Kana thĩĩna yongwa nĩ ũrĩa antũ beeri bwegie Bibiria? No kwĩthĩrwe ũrĩa beeri tĩ mma?

Ngerekano, antũ bathũgaanagia atĩ Bibiria yugaga Mũrungu nĩwe wathaga nthĩgũrũ. Ĩndĩ-rĩ, ũu nĩu kũrĩ? Nthĩgũrũ ĩjĩ nĩthũũkĩte mono! Nĩũjũrĩtwe nĩ ũrũrũ na mĩthangĩko, mĩrimo na ikuũ, ũkĩa na mogwati. Nĩatĩa Mũrungu wa wendo eethĩrwa nĩwe ũretaga mantũ jau jonthe?

No wende kũmenya ĩcookio? Ũrĩa Bibiria yugaga bwegie ũrĩa wathaga nthĩgũrũ bwomba gũkũrigaria!

Mbuga ũkwona kĩrĩra kĩrĩa kĩejani broshuene ĩjĩ kĩrĩĩrĩgĩĩra Bibiria. Akũũjĩ ba Jehova betĩkĩtie Bibiria nĩ ya kwĩrĩgĩĩrwa ĩtũtongeeria. Tontũ Ruteto rũu “rwekirwe ni Murungu nkorone ya muntu uria warwandikire, niru kiguni gia kuritana antu nakio, na gia kumenyithagia antu wiyia bwao, na gia kubakaanagia.” (2 Timotheo 3:16) Nũkũbatara gũcũnkũũna wengwa iuku rĩrĩ rĩa karaaja—ĩndĩ no rĩa kĩnandĩ!