SOKRE 10
Wãn to la Biiblã tõe n sõng maam?
BÕE LA FO NA N MAANE?
Wala makre: A Davɩɩd togda sore, tɩ yʋng wa ta. A pa le ne zĩigã sõma ye. Bala a montɛɛrã faar me wa n kiime. A yaool n pasgda weoogo, tɩ tẽng pa pẽ yambẽ ye. A sã n pa bao yellã tɩɩm, a tõe n wa menemame, bɩ n lʋɩ bok pʋgẽ.
Fo sã n bee a Davɩɩd zĩigẽ, bõe la fo na n maane?
RENG N TAGS NEERE!
Bũmb wʋsg la f tõe n yãk yam n maane:
-
F tõe n soka ned t’a wilg-f sorã sẽn yaa to-to.
-
F tõe n widga torse.
-
F tõe n ket n tara kẽn bala.
Yaa vẽeneg tɩ f sã n kell n tall kẽn bala, pa na n sõng-f ye.
F sã n widg torse, f na n yãa sõma n yɩɩd f sẽn na n bao ned n sok sorã sẽn yaa to-to. Torsã vẽenem na n sõng-f lame tɩ f bãng n kẽn sõma.
Biiblã me yaa vẽenem sẽn sõngd tɩ ned bãng a sore.
Yaa sebr sẽn tõe n sõng foo:
-
tɩ f mao ne vɩɩmã zu-loeese,
-
tɩ f bãng f mengã sõma, la f bɩɩs zʋg-sõma,
-
tɩ f bãng f sẽn tõe n maan tɩ f vɩɩmã tall barka.
SOGSG NEB WƲSG SẼN SOKD LEOORE
Ninsaal sã n wa bãng goam bala, a sɩngda sogsgo.
-
Bõe n be saasẽ?
-
Bõe yĩng tɩ ãdsã pɩnda?
La d sã n wa bɩtẽ, d sɩngdame n sokd sogsg vɩɩmã wɛɛngẽ. Wala makre:
La sã n mikame tɩ sogs-kãensã leoorã sɩng n bee Biiblã pʋgẽ?
Neb wʋsg yetame tɩ Biiblã yaa sebr sẽn pid ne soalem la kiba-kʋda, wall t’a pa le tar yõod ne-do, bɩ t’a goamã võor wʋmb yaa toogo. La rẽ yĩnga Biiblã sɩd yaa woto bɩ, bɩ yaa bũmb ning nebã sẽn yet Biiblã zugã n pa zemse? Rẽ yĩnga, b rɩɩ kibayã sõma sɩda?
Wala makre, nebã tẽedame tɩ Biiblã yetame tɩ dũniyã bee Wẽnnaam nugẽ, t’a maand a sẽn date. La rẽ yĩnga yaa sɩd bɩ? Ges-y zũnd-zãndã sẽn pid dũniyã. Zĩig fãa yaa sũ-sãams la namsgo, bãas la kũum, naong la yel-beedo. Woto tõe n yɩ Wẽnnaam sẽn yaa nonglem soabã raab sɩda?
Fo nongẽ lame n paam sok-kãngã leoorã bɩ? Biiblã sẽn yet rẽ wɛɛngẽ wã tõe n ling-f lame.
Yaa vẽeneg tɩ f yãame tɩ sagls nins b sẽn kõ seb-kãngã pʋgẽ wã tika Biiblã zugu. A Zeova Kaset rãmbã kɩsa sɩd tɩ Biiblã kõta sagls sẽn tõe n sõng ned buud fãa. Bala “yaa Wẽnnaam n vẽneg tɩ b gʋlse, la a yõodã yaa zãms neda, wilg ned a kongre, rems yɛla.” (2 Tɩmote 3:16, 17, MN) Yaa sɩd tɩ b sẽn gʋls Biiblã daar zãra, la a ket n tara yõod ne-do. Fo sã n zãms-a, na n naf-f lame.