Yelenganya cino cikucitika: E Davidi akupita mukaya uwusiku. Pamulandu wakuti kufisile, atamanyile na pa ncende pano wafika. Walola ukuti kuno wafika kwapusana sana nakuno akuya swinya wamanya ukuti asovile. Walola ukuti afwile apulumbizile vye inzila yino teli nu kupita.

Uzye nga walinji we Davidi, ungacita wuli?

Ungasolapo:

1. Ukuwuzya wano wangakulanjizya inzila.

2. Ukuwomvya e tochi.

3. Ukutwalilila vye ukupita.

Ukusolapo ukucita vino vili pa C pamwi kutanga kuwombe icete

Ukusolapo ukucita vino vili pa B kwazipa kwalusya vino vili pa A. Amuno wandi ulange uli nu tochi iyakukutungulula konsinye kuno ukuya.

Avino nu Baibolo nye ingakutungulula!

Lyo ibuku lino lyalumbuka insi yonsinye

• lingakwavwa ukumanya ivyakucita pano ukupita mu ntazi

• lingakwavwa ukumanya vino wawa na vino ungacita pakuti uwe umuntu muzima

• lingakwavwa ukumanya ivyakucita pakuwa ni nsansa

Ndi twasambilila vye ukulanda, tukawuzya amawuzyo.

• Acani cino iyulu likalolecela blue?

• Uzye intanda zyapangwa na vyani?

Pano tukuya tukukula tukavwamba ukumanya umulandu wuno ivintu vimwi vikaciticila munsi.

• Acani cino iviwipe vikaciticila?

• Acani cino awantu wakafwila?

Nga nga cakuti ivyasuko kwe ya-a amawuzyo vyawa mwe Baibolo?

Awantu awavule wakati mwe Baibolo mwawa vye utwili ni milumbe ne wamwi wakati yisiwomba, nanti ukuti yawoma sana ukwivwa. Uzye cino catala we Baibolo nanti awantu vye wano wapotwa ukwivwicisya vino ikalanda? Uzye pamwi wawanena ivyawufi pe Baibolo?

Ku cakulolelako, awantu wakakwelenganya ukuti e Baibolo ikati e Leza awino akatungulula insi. Uzye kweni molimonye? Insi yikuya yikuwipilako vye! Mwizwile intazi nu wuyimvi, ukulwala ni mfwa, amasanso nu uwupiina. Uzye e Leza uwalukundo awino angalenga ivyamusango wo o ukuti vyatuciticila?

Uzye ungakunda ukumanya icasuko? Vino e Baibolo yikalanda pe wino akatungulula insi vingakuzungusya!

Ufwile uweni ukuti ukwavwa konsinye kuno kuli mwe yo-o e broshuwa kufumile mu Baibolo. Inte zya kwe Yehova wasinincizya ukuti mwe Baibolo amuno mukafuma ukwavwa kuno tungasuwila, amuno “yafutilwa nu mupo wakwe Leza swinya yawa nu mulimo wakusambilizya, ukusunda, nu kulunjika ivintu.” (2 Timoti 3:16, 17 NWT) Acino ufwile ukuwazya lyo ibuku, cingatenga alyakali nkaninye lelo likawomba!