Rangarirai ciitiko ici: Dhavhidhi ari kufamba no karu pa ndau yokuti apana no ciro caanoziva. Zvitatijo zvo mucitaka zvovonesa kuti ari pa ndau yaacaidikanepi kuva. Dhavhidhi ovona kuti warasika. Kangaije watora citaka ciciripi icona pa hwendo hwake.

Kudari nowainga Dhavhidhi, waizoitenyi?

Uno njira jakawanda:

1. Kubvunjisa gwanja.

2. Kusota pa mapa, kana kushandisa GPS.

3. Kuenderera mberi wecicovha, wecivetera kuti unozowana citaka caunodaro kumbejiyo.

Pacina kukakanija, zano rocitatu arithuki rabesera.

Zano rocipiri rinobesero kupinda rokutanga. Ucito waita zvese, mapa kana GPS ndizvona zvaunonga unazvo phedo pa hwendo hwako hwese, zvecikubesera kuti utevere gwanja raunoda.

Bhaibheri ringakubesera mu njira yakafanana!

Bhuku iri rakanakisisa ringa

• kutungamirira pa zvineso zvoupenyu

• kukubesera kuti ujije ngo pamusoro pako kamare zve kuti uve mundhu waushoni

• kukutatija manera aungava no upenyu hwaushoni

Patinotanga kujija kuvereketa, tinoita mubvunjo inga iji.

• Ngenyi gore rakaita bhurumu?

• Ndhondho jakaizwa ngenyi?

Ngo kufamba ko nguva tinotanga kuita mubvunjo ngo pamusoro po nyika yakatitendeneja.

• Ngenyi zvakashata zvinoitika?

• Ngenyi vandhu vanofa?

Zvakadini kudari mupinguro jo mubvunjo iji jese jeciwanika mu Bhaibheri?

Vandhu vazinji vanonanga kuti Bhaibheri rakazara ngo zviro zvicikazivikanwi pomwe no ngano, aricashandi, kana rinonesa kurizwisisa. Asi i Bhaibheri kamare rinonesa kana zvinozwa vandhu ngo pamusoro po Bhaibheri kana ngo shwiro huru?

Inga muezaniso, vandhu vanorangarira kuti Bhaibheri rinoti Mwari ndiena ari kutonga nyika. Asi zvaizoitisa kudini? Nyika iyi aizivi kugajana! Yakazara ngo zvinohwaja no ndhendha no rufu, urombo zve ngozi. Zvingaitisa kudini kuti Mwari wo rudo aitise zvese izvi?

Waidakarira kuwana mupinguro? Zvinonanga Bhaibheri ngo pamusoro po ari kuvonerera nyika kangaije zvingakushamaisa!

Inga zvowavona kuti ngwajo jinowanika mu bhurushura iri jakacijikira mu Bhaibheri. Zvapupu zva Jehovha zvino cokwadi cese kamare co kuti Bhaibheri ndicona cinyuke co ndhungamiriro. Ngo kuti ‘rakafemehwa ndi Mwari, rinobesera pa kujijisa, kupangira, kufujura unyepi no kurebesa mu urungami.’ (2 Timoti 3:16, 17) Iwewe unodikana kurizemena wega kamare bhuku iri ro kare—hina—bhuku ra wari!