Dhiladhila konkalo ndjika: David ota hingi moshitopolwa moka kee shi mo. Omandhindhiliko gomomapandaanda nosho wo iinima ayihe mbyoka e wete otayi ulike kutya inu uka hoka e na okuya. David okwa mono kutya okwa puka. Otashi vulika a landula ondjila ya puka manga ta hingi.

Mbela ando ongoye wa li David, ando owa ningi po shike?

Opu na iinima oyindji mbyoka to vulu okuhogolola wu ninge:

1. Oto vulu okupula ekwatho.

2. Oto vulu okutala mokaalita.

3. Oto vulu okutsikila nokuhinga, wu na etegameno kutya oto ka pukuluka.

Osha yela kutya ehogololo etitatu itali ke ku kwathela nandonando.

Ehogololo etiyali ewanawa li vule lyotango. Okaalita oto vulu okukala wu ka na molweendo lwoye aluhe, ke ku kwathele noke ku wilike mondjila yoye.

Ombiimbeli nayo otayi vulu oku ku kwathela momukalo gwa faathana.

Embo ndika lya tseyika nawa otali vulu

• oku ku kwathela momaupyakadhi goye

• oku ku kwathela wi itseye nawa noku ku ninga omuntu e li nawa

• oku ku ulukila nkene to vulu okukala nonkalamwenyo ombwanawa

Okuza kuunona sho twa tseya okupopya, otwa tameke okupula omapulo.

• Omolwashike egulu embulau?

• Omolwashike oonyothi hadhi adhima?

Konima yethimbo ngele twa koko ohatu tameke okupula omapulo kombinga yiinima mbyoka tayi ningwa muuyuni.

• Omolwashike iinima iiwinayi hayi tu ningilwa?

• Omolwashike aantu haya si?

Omayamukulo gomapulo ngoka otaga adhika mOmbiimbeli.

Aantu oyendji ohaya ti kutya Ombiimbeli oyu udha oongano nomahokololo omakulu kaage na oshilonga nenge omadhigu okuuviwa ko. Ihe mbela Ombiimbeli oyo ngaa shili yi na uupyakadhi, nenge shoka aantu yu uva kombinga yayo osho shi li uupyakadhi? Mbela oye yi uvithwa ko papuko?

Pashiholelwa, aantu ohaya dhiladhila kutya Ombiimbeli otayi ti kutya Kalunga oye ta pangele uuyuni. Ihe mbela shoka otashi wapa ngaa? Uuyuni mbuka owa yonuka. Owu udha okumona iihuna, uuwehame, eso, ondjala nosho wo iiponga yopaunshitwe. Mbela Kalunga omunahole oye e etitha iinima mbyono?

Mbela owa hala okutseya eyamukulo? Shoka Ombiimbeli tayi popi kombinga yaangoka ta pangele uuyuni otashi vulika shi ku kumithe.

Otashi vulika wa mona kutya uuyelele mboka wu li mokambo haka owa kankamena kOmbiimbeli. Oonzapo dhaJehova odha tompwa kutya Ombiimbeli oyi shi okwiinekelwa noyo owala tayi vulu oku tu wilika. Odhi shi shi, molwaashoka “enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka.” (2 Timoteus 3:16, 17) Otashi ka kala oshiwanawa lela ngele owa konakona embo ndika ekulu, ihe oli na natango ongushu.