Xtlanemili itech yejuin: David nejnentiuj ika yeuajli ipan se kalpan. Niman pampa itlayoua, xok kimati kanon nemi niman kuakon kasikamati ika yopoliuj. Kanaj ijkuak nejnentiaya xkuajli okajsik ojtli.

Tla tiDavid yeskia, ¿tlenon tikchiuaskia?

Miyek tlen uelis tikchiuas:

1. Tikijlis yakaj mamitsititi kenon tajsis.

2. Tiktekitiltis tlen ika timotlauiluijtias.

3. Tinejnentias pampa tikchias ijkon tikonextis ojtli.

Nesi ika xkuajli yes tla tiktlapejpenia tlen ika yeyi.

Tlen ika ome melak uelis mitspaleuis xijkon ken kachtopa, pampa tlen ika timotlauiluijtias mitspaleuis xkita ojtli.

Biblia noijki ijkon uelis mitspaleuis.

Amoxtli tlen melak yononemakak uelis:

• Mitsyekanas ijkuak tikimixnamikis tlaueltin.

• Mitspaleuis kuajli xmoixmati niman ijkon tikpiyas kuakualtin kualneskayomej.

• Mitsmachtis kenon melak kuajli tinemis.

Ijkuak peua titlajtouaj noijki peua titetlajtoltiaj:

• ¿Tleka nejkuania moxtli?

• ¿Akinon okinchijchiuj sitlalimej?

Sakin peua titetlajtoltiaj itech tlen panoua ipan tlaltikpaktli:

• ¿Tleka panoua tlen xkuajli?

• ¿Tleka timikij?

¿Tikmatstoya ika Biblia kinnankilia yejuin tlajtoltilistin?

Miyekej tlaltikpakchanejkej kijtouaj ika Biblia tlajtoua itech miyek cuentos, noso ika yejon amoxtli xok tepaleuiya noso ika ouijtika tikasikamatis. San ika ¿yejon yemelak? ¿Yemelak tlen kijtouaj tlaltikpakchanejkej itech Biblia? ¿Kanaj xijkon ken okimijlikej?

Xnemili, tlaltikpakchanejkej kineltokaj ika Biblia kijtoua ika toTajtsin kiyekana tlaltikpaktli. San ika ¿uelis tikneltokaskej yejon? ¡Yejuin tlaltikpaktli melak yoijtlakauj! Nochiuiyan tikitaj ika miyekej noyolkokouaj niman tlajyouiyaj, kualoj niman mikij, xkipiyaj tlen ika nopanoltiskej niman tlaijtlakaui. ¿Uelis se toTajtsin akin tetlasojtla kichiuas nochi yejuin?

¿Tikuelitaskia tikmatis akinon kiyekana tlaltikpaktli? Ken tlanankilia Biblia kanaj uelis mitsmojkatlachialtis.

Kanaj yotikitak ika itlajtolpaleuilisuan yejuin amatlajkuilojli nokixtiaj ipan Biblia. Iteixpantijkauan Jehová kuajli yokitakej ika Biblia uelis kinyekanas pampa “itech Dios uajlitikaj, niman [...] techpaleuiya. On Yektlajkuilojli techmachtia on tlen melauak, techchikajkanotsa” (2 Timoteo 3:16, 17). Kipiya ika tikixmatis yejuin amoxtli tlen maski yeuejkaui onoijkuilo melak tepaleui ipan yejuin tonajli.