Imadyin mo yan eksena: First time nen David so man-drive ed sakey ya lugar. Alikas to ya nababalang la ta aliwa la iramay nanenengneng ton ngaran na karsada. Seguro walay aliwan nilikoan to.

No sika si David, antoy gawaen mo?

Walay pigaran pampilian mo:

1. Mantepet ka.

2. Mangusar kay mapa odino GPS.

3. Ituloy mo labat ta isipen mon makasabi ka lanlamang ed laen mo.

No C so pilien mo, ompan mas nabalang ka.

Mas maong imay B nen samay A ta sarag mon usaren may mapa o GPS anggad makasabi kad laen mo. Ibangat to ka ni no iner so dalanen mo.

Ontan so tulong ya iiter na Biblia!

Sayan popular ya libro et

• ibangat to kad gawaen mo no wala ray problemam

• tulongan to ka pian nakabat moy sarilim tan magmaliw kan mas maong ya too

• ipaamta tod sikay sekreto na maliket a bilay

Manlapu la nen makapansalita itayo, itetepet tayo:

• Akin et asul so tawen?

• Panon ya niwala iray bitewen?

Nen baleg tayo la, onia ray itetepet tayo:

• Akin et wala ray mauges ya nagagawa?

• Akin et ompapatey iray totoo?

Panon to no wala labat manaya ed Biblia so ebat?

Dakel so mangibabaga ya say Biblia et puros is-istorya tan alamat, ya daan la itan, odino mair-irap ya talosan. Balet talaga kasin say Biblia so problema, odino say iisipen na totoo tungkol ed Biblia? Ompan aliway impormasyon ya naamtaan da?

Alimbawa, say amta na totoo et ibabaga na Biblia ya kokontrolen na Dios so mundo. Balet tua kasi itan? Magulogulo so mundo! Napno na kairapan, sakit tan patey, irap na bilay tan kalamidad. Imposiblin nagawaan iya na maaron Dios!

Kasin labay mon naamtaan no anton talagay tua? Ompan nabigla kad ibabaga na Biblia!

Seguro apansin mon saray bilin ed sayan brosyur et base ed Biblia. Manisia iray Tasi nen Jehova ya napantiwalaan iray simbawa ya nabasa ed Biblia. Say rason et ‘nanlapu itan ed Dios tan makatulong ed panagbangat, panagsimbawa, tan panagdisiplina.’ (2 Timoteo 3:16, 17) Kanian kailangan mo sirin ya aralen iyan daan la pero moderno ya libro!