Ka molatk er tiang: A David a omekall er a chelsel a basio el diak lodengelii. Aike el sign el ngar er a rael me a teletelel a beluu a ochotii el kmo, ngmla soiseb er a basio el diak el kirel el ngar er ngii. Ngmlo medengei el kmo ngmla remiid. Nglocha milecheuid e soiseb er a ta er a rael.

Oleko ke mle David, e ke mo mekerang?

Ngar er ngii a bebil tekoi el sebechem el meruul:

1. Moker er a rechad el kirel a ulekrael.

2. Momes er a map me a lechub e mousbech er a GPS.

3. Molemolem el omekall e ke locha mo metik er a rael el kirem el merael er ngii.

Ngbleketakl el kmo sel 3 el tekoi a diak el sal lungil el ulekrael.

E a 2 el tekoi a ngar er ngii a klungiolel e le map me a GPS a omolab el ngosukau el omekrael er kau.

A Biblia me ngdirrek el sebechel el ngosukau er a osisiu el rolel!

Ngkot el merael a chisel el babier

• ngmeskau a ulekrael el kirel a semecheklel a mondai er a klengar

• ngosukau el mo ungil el medengelkau e rullau el mo ungil el chad

• ngochotii er kau a rael el mo er a kot el ungil el klengar

Kede omuchel el oker a ker sel bla bo el sebeched el mengedecheduch.

• Ngera uchul me a eanged a mellemau?

• A btuch ngrruul er a ngerang?

E a uriul e kede omuchel el oker a ker el kirel tia el beluulechad.

• Ngera uchul me a mekngit el tekoi a duubech?

• Ngera uchul me a rechad a mad?

Ngmekerang a lsekum a nger er aika el ker a di mle blechoel el ngar er a Biblia?

A rebetok el chad a melekoi el kirel a Biblia el kmo, ngar er ngii a betok el delbochel el tekoi me a cheldecheduch er ngii, e dirrek el kmal chuodel el babier me a lechub e ngkmal meringel er kid a mo medengei a belkul a tekoi el ngar er a chelsel. Me a leuaisei, a Biblia ngmondai me a lechub e nguldesuir a rechad a bai mondai? Negcheleuid a klemedengei lolab?

El ua tiang, a rechad a omdasu el kmo a Biblia a melekoi el kmo a Dios a mengedereder er a beluulechad. Engdi ngmekerang e sebechel el mo uaisei? Tia el beluulechad a diak el mutebechel! Ngmui er a ringel me a ongarm me a secher me a chelebuul me a telemellel a beluu. Me ngmekera betik a rengul el Dios e uchul aika el tekoi?

Ngsoam el mo medengelii a nger er tiang? Aike el lolekoi a Biblia el kirel ngike el mengedereder er a beluulechad a locha mo chosir a rengum!

Ke mo mtebengii el kmo aike el ulekrael el dengai er tia el babier a mlengai er a Biblia. A Resioning er a Jehovah a oumerang el kmo a Biblia a sebeched el ngmai a ungil ulekrael er ngii. Nguaisei e le ng ‘milluches luleak a Reng ra Dios, me ngngarngii a blkul er chosisechakl, ma chomellach, ma chomekmelemalt.’ (2 Timothy 3:16, 17, BT) Me ngerechelem el di kau el merriter er tia el babier alta e ngchuodel engdi, ngdirk sebeched el ousbech er ngii er chelecha el taem!