Kaypi tʼukuriy: Davidqa mana rejsisqan llajtapi tuta purishan. Laqha kasqanrayku maypichus kashasqanta mana yachanchu. Chinkasqa kashasqantataj reparan. Maynintachus rinanta nichá allinta qhawarikorqachu.

David kawaj chay, ¿imatá ruwawaj?

Wakin imasta ruwayta atinki:

1. Pitapis tapurikuyta atinki maymanchus rishanki chayman chayanaykipaj.

2. Linternaykita japʼichiyta atinki.

3. Purillaytapuni atinki, maynintachus rinayki karqa chay ñanta tarinaykikama.

Kinsa kajta ajllayqa mana allinchu.

Iskay kajta ajllayrí ñaupajmanta nisqa aswan sumaj: Imaraykuchus uj linternaqa maynintachus rinaykita kʼanchanaykipaj yanapasonqa.

Ajinallatataj Bibliapis yanapasunkiman.

Waj librosmanta nisqa Bibliaqa astawan llojsin, imaraykuchus Bibliaqa:

• Llakiypi kashajtiyki yanapasunkiman.

• Imayna runachus kasqaykita reparakunaykipaj, allin runa kanaykipajtaj yanapasunkiman.

• Allinta kausakunaykipaj yanapallasunkimantaj.

Parlayta qallarisqanchejmantapacha tapukuyta qallarinchej:

• ¿Pitaj cielota ruwarqa?

• ¿Imamanta chʼaskas ruwasqa kashanku?

Chantá kay jallpʼapi imaschus kashasqanmanta tapukuyta qallarillanchejtaj:

• ¿Imaraykú sajra ruwaykuna kallanpuni?

• ¿Imaraykú wañunchej?

Biblia kay tapuykunaman kutichisqanta, ¿yacharqankichu?

Ashkha runas ninku Bibliaqa cuentosllamanta parlasqanta, may unayniyojña kasqanta chayri mana entiendeyta atinapaj jina kasqanta. ¿Chay cheqachu? ¿Imatachus Bibliamanta nisqanku cheqachu, pantasqapichu kashanku?

Sutʼincharinapaj, runasqa Dios kay jallpʼata kamachishasqanta, chaytataj Biblia yachachisqanta ninku. Chay nisqanku, ¿cheqapunichu? Kay mundoqa sajra ruwaykunamanta juntʼa kashan. Tukuynejpi nanaykuna, ñakʼariykuna, onqoykuna, wañuy, wajchayay waj llakiykuna ima tiyan. Chaykunamanta munakoj Dios, ¿juchayojchu?

¿Pichus kay pachata kamachishasqanta yachayta munawajchu? Bibliaj kutichiynenqa tʼukuchisonqa.

Kay folletopi kaj yuyaychaykuna Bibliamanta orqhosqa kasqanta reparankichá. Jehovaj testigosnenqa sutʼita yachanku Biblia, kausayninkupi yanapasqantapuni, imaraykuchus “Diosmanta tukuy Qhelqasqaqa paypa yuyaychasqan kaspa, may sumaj kashan yachachinapaj, juchata reparachinapaj, cheqa kajman kutirichinapaj” (2 Timoteo 3:16, 17). Kallpachakuy kay may unayña qhelqasqa librota rejsinaykipaj, kay tiempopi mayta yanapawasqanchejta yachanaykipaj ima.