Luku a tori disi: David e rèi na ini wan birti di a no sabi srefisrefi. Te a e leisi den bord nanga den stratinen, dan a e si taki a doro na wan heri tra presi. David si taki a lasi. Kande a koti go na ini wan pasi pe a no ben musu go.

Efu yu ben de David, san yu ben o du?

Disi na san yu kan du:

1. Aksi wan sma a pasi.

2. Luku tapu wan karta noso gebroiki wan GPS.

3. Rèi go doro fu di yu howpu taki te fu kaba yu o doro pe yu musu go.

Yu kan frustan taki furu fu wi no o teki C, fu di na soso lasi ten.

Efu yu teki A, dan dati bun, ma B moro bun fu di a heri pasi yu abi a karta noso a GPS fu sori yu pe yu musu go.

Na so Bijbel kan yepi yu tu.

A buku disi seri moro furu leki iniwan tra buku èn a kan

• yepi yu nanga ala den problema fu a libi

• yepi yu fu leri sabi yusrefi èn fu tron wan moro bun sma

• sori yu fa yu kan abi a moro bun libi di de

Sensi wi man taki wi e poti aksi.

• Fu san ede hemel blaw?

• Suma meki den stari?

Te wi kon bigi èn wi e si san e pasa na grontapu, wi e poti tra sortu aksi.

• Fu san ede ogri e miti sma?

• Fu san ede sma e dede?

Yu ben sabi taki den piki ben de langa ten kaba na ini Bijbel?

Furu sma e taki dati Bijbel lai anansitori nanga owruten tori. Den e taki dati a no fu a ten disi èn taki a muilek tumusi fu frustan. Ma na Bijbel muilek so, noso na den sani di sma yere fu Bijbel? Na sma fruteri den sani fu Bijbel di no tru?

Fu eksempre, sma e denki taki Bijbel e leri taki na Gado e tiri grontapu. Ma fa dati kan? Grontapu bruya srefisrefi! Na ala sei sma e sari, sma e siki èn den e dede. Sma e pina èn rampu e miti den. Fa wan Gado di abi lobi kan du den sani disi?

Yu wani sabi san na a piki? Yu wani sabi suma e tiri grontapu? Kande yu o fruwondru fu yere san Bijbel e taki.

Soleki fa yu si, dan den moi rai na ini a brochure disi komoto fu Bijbel. Yehovah Kotoigi e bribi taki Bijbel na a moro bun buku di kan yepi wi na ini a libi. Dati de so fu di na „Gado srefi ben meki sma skrifi ala den sani di de na ini Gado Buku. Den sani disi bun fu gi leri, fu gi rai, fu poti sani kon reti” (2 Timoteyus 3:16, 17). A tru taki Bijbel na wan owru buku, ma toku a abi bun rai di wi kan gebroiki te now ete. Dati meki a bun fu studeri en!