Kěnang pẹ̌pikirẹ̌ ini: David nẹ̌bawa oto, kụ nahumpạ sarang tampạ i sie běga. Bọu apa nikasilone, i sie masingkạ, ene bal᷊inẹ tampạ sebenarẹ̌e kahumpakenge. David nakasingkạ i sie seng napal᷊idẹ̌. Tantu i sie seng nẹ̌sal᷊a ral᷊eng.

Mạeng i kau nakoạ i David, apa sarung koatengu?

I kau botonge měmile piram baụ hal᷊ẹ̌ ini:

1. Mẹ̌kiwal᷊o ral᷊enge.

2. Měmanda peta arau měpakẹ GPS.

3. Tatapẹ̌ dumal᷊eng, mělẹ̌harapẹ̌ sarung makaěbạ dal᷊eng sarang tampạ kahumpakengu.

Tantu, měmile Bageang C ene tawe makatul᷊ung si David.

Měmile Bageang B ene limembong kapaelange bọu bageang humotong. Bọu ene lai peta arau GPS hanesẹ̌ bẹ̌bawaěng, ene makatul᷊ung měngahạ si kau tadeạu mahumpạ.

Alkitapẹ̌ lai kerene!

Bukẹ̌ ini kal᷊awokange su dunia, botonge

• měněntiro si kau apa harusẹ̌ koateng su tempong piạ masalah

• makatul᷊ung si kau masingkạ apa kurangu, tadeạu mẹ̌bal᷊ui makoạ taumata mapia

• měnodẹ si kau dal᷊eng pěbawiahẹ̌ kapaelange

Su tempong i kitẹ nakakoạ mẹ̌bisara, i kitẹ masau makiwal᷊o.

• Kawe nụe langị birụ?

• Bituing nikoạ bọu apa?

Bọu ene su tempong kakạguwạe, i kitẹ měnětạ makiwal᷊o apa nariadi su pěbawiahẹ̌.

• Kawe nụe karal᷊akisẹ̌ nariadi?

• Kawe nụe taumata mate?

Kerea maning sasimbahe seng piạ dongkeng kangerẹ su Alkitapẹ̌?

Lawọ taumata naul᷊ị Alkitapẹ̌ ene napenẹu běke, lohone seng těbe, arau masusah kaěnaěng. Mạeng kerene Alkitapẹ̌ nẹ̌sal᷊a, arau bawerang u taumata? Apa bawerang taumata botonge lai mẹ̌sal᷊a?

Contone, lawọ taumata mẹ̌pikirẹ̌ Alkitapẹ̌ naul᷊ị Mawu měngẹ̌ngawasạ dunia ini. Apa ene kahěngang? Dunia orasẹ̌ ini seng dal᷊akị! Lawọ kasasigěsạ dingangu kasasusah, kasasakị dingangu papate, taumata masusah dingangu hombang. Apa Mawu matal᷊ěntụ někoạ kěbị ini?

Apa i kau mapulu makaěbạ sasimbahe? Apa niul᷊ị u Alkitapẹ̌ soal i sai měngẹ̌ngawasa dunia ini tantu makaherang si kau!

I kau lai tantu nakasilo, kěbị tatěntiro su brosur ini dasare bọu Alkitapẹ̌. Sahiding Yehuwa mangimang Alkitapẹ̌ ene lohone tatěntiro gunang pěbawiahi kitẹ, kụ botonge kapěngimangeng. Ene ual᷊ingu Alkitapẹ̌ kai ”nipal᷊ohoěngben Duata ringangu piạbe pul᷊ise ipaněntiro katěngadẹ̌, baugu ipěnasa ringangu ipaněngkul᷊ẹ̌ apang nẹ̌sal᷊a ringangu ipěmihing taumata”. (2 Timotius 3:16, 17) I kau lai makapěndang hal᷊ẹ̌ mẹ̌sul᷊ung mạeng i kau měmarikěsa Alkitapẹ̌. Maning bukẹ̌ ini seng marěngụ niwohẹ, těntirone tatapẹ̌ mapakẹ sarang orasẹ̌ ini!