Sioloto atu ki he talanoa ko ení: ‘Oku faka‘uli atu ‘a Tēvita ‘o ne fakatokanga‘i ‘oku hala‘atā ke ne ‘ilo ha me‘a ‘i he feitu‘u ko iá. Ko e ngaahi faka‘ilonga halá mo e ngaahi fale ‘iloa he koló ‘oku fakahaa‘i mai ai ‘oku ‘ikai ko e feitu‘u eni ‘oku totonu ke ne a‘u ki ai he taimi ko iá. ‘Oku fakatokanga‘i ‘e Tēvita ‘okú ne hē. ‘Oku pau pē na‘á ne afe ‘i ha hala kehe lolotonga ‘ene fonongá.

Kapau ko Tēvita koe, ko e hā te ke faí?

Ko e ngaahi me‘a eni ke ke fili mei aí:

1. A. Kole ki ha fakahinohino.

2. E. Ngāue‘aki ha mape pe ko ha GPS.

3. F. Hokohoko atu ho‘o faka‘ulí mo e ‘amanaki te ke ‘ilo pē ‘a e halá.

‘Oku hā mahino, ko e fili F he‘ikai ke ola lelei.

Ko e fili E ‘oku lelei ange ia ‘i he fili ‘uluakí. Ko hono mo‘oní, ko ha mape pe ko ha GPS ‘e tokoni lahi ia lolotonga ‘a e fonongá, ‘o tokoni‘i ai koe ke ne tataki ho halá.

‘Oku lava ‘e he Tohi Tapú ke ne tokoni‘i koe ‘i ha founga meimei tatau!

‘Oku lava ‘e he tohi fakataua lahi taha ko ení ‘o

• tataki koe ‘i he ngaahi palopalema ‘o e mo‘uí

• tokoni‘i koe ke ke ako fekau‘aki mo koe pea ke ke hoko ko ha tokotaha lelei ange

• fakahaa‘i atu ‘a e anga hono ma‘u ‘a e founga mo‘ui lelei tahá

Mei he mōmeniti pē ‘oku lava ke tau lea aí, ‘oku tau ‘eke ‘a e ngaahi fehu‘i.

• Ko e hā ‘oku pulū ai ‘a e langí?

• ‘Oku fa‘u‘aki ‘a e ngaahi fetu‘ú ‘a e hā?

Ki mui ai, ‘oku kamata ke tau ‘eke ‘a e ngaahi fehu‘i fekau‘aki mo e māmani takatakai ‘iate kitautolú.

• Ko e hā ‘oku hoko ai ‘a e faingata‘á?

• Ko e hā ‘oku mate ai ‘a e kakaí?

Fēfē kapau ko e tali ki he ngaahi fehu‘i ko ení kuo fuoloa ‘ene hā ‘i he Tohi Tapú?

‘Oku pehē ‘e he kakai tokolahi ko e Tohi Tapú ‘oku fonu ‘i he ngaahi talatupu‘a mo e ngaahi fananga kuo ‘olokuonga, pe ‘oku fu‘u faingata‘a ia ke mahino‘i. Ka ko e mo‘oni ko e palopalemá ‘a e Tohi Tapú pe ko e me‘a kuo fanongo ai ‘a e kakaí fekau‘aki mo e Tohi Tapú ‘a e palopalema mo‘oní? Na‘e takihala‘i kinautolu?

Ko e fakatātaá, ‘oku fakakaukau ‘a e kakaí ‘oku pehē ‘e he Tohi Tapú ‘oku pule‘i ‘e he ‘Otuá ‘a e māmaní. Ka ‘oku lava fēfē ke hoko ia? ‘Oku kovi ‘aupito ‘a e māmani ko ení! ‘Oku fonu ‘i he faingata‘á, mamahí, puké mo e maté, masivá mo e ngaahi fakatamakí. ‘E lava fēfē ke tukuaki‘i kotoa eni ki ha ‘Otua ‘ofa?

Te ke sai‘ia ke ke ‘ilo‘i ‘a e talí? Te ke ‘ohovale nai ‘i he me‘a ‘oku lea‘aki ‘e he Tohi Tapú ‘o fekau‘aki mo e tokotaha ‘okú ne pule‘i ‘a e māmaní!

Te ke fakatokanga‘i nai ko e ngaahi fale‘i ‘oku ma‘u ‘i he polosiua ko ení ‘oku makatu‘unga ‘i he Tohi Tapú. ‘Oku tuipau ‘a e Kau Fakamo‘oni ‘a Sihová ko e Tohi Tapú ko e matavai ia ‘o e tataki alafalala‘anga. Koe‘uhí kuo “fakamānava‘i ia ‘e he ‘Otuá pea ‘oku ‘aonga ki he akonaki, ki he valoki, ki he fakatonutonu.” (2 Tīmote 3:16, 17) ‘Oku totonu ke ke sivisivi‘i ‘a e tohi motu‘a ko ení—ka ‘oku kei ‘aonga pē!