Muupuwele ela: Davidi oneetta muttetthe mmosa ohiyu. Vahiila ni vathi vooriipa, nto owo khoniwerya oweha ephiro. Davidi onnoona wira oorimeela. Waaniheryasa wookhala okathi okenle awe estarata yoohikhalela.

Vaakhanle wira nyuwo mwa Davidi, mwaarowa opaka exeeni?

Mwaamuthanla etthu emosa-emosa ntoko:

1. Okohererya ephiro.

2. Omurumeela lampada.

3. Ovikaniha weetta muupuwelaka wira munoophwanya ephiro.

Vaarowa okhala voololo othanla efrase 3.

Efrase 2, ti yooloka ovikana yoopacerya. Maana lampada mwaarowa onvarela mmatatani wira omwaleeleke ephiro mpakha ophiya onrowa anyu.

Moolikanasa, Biibiliya pooti wookhaliheryani!

Eliivuru eyo ti yootepa okaiwa molumwenkuni. Nto eyo pooti;

• wookhaliheryani okathi wa mixankiho;

• owiixuttihani osuwela mukhalelo anyu ni okhala mutthu ooloka;

• ni owooniheryani moota wookhalana okumi wooloka.

Okhuma okathi oniixutta ahu olavula, ninnipaka makoho ntoko ala:

• Xeeni erimu eryaaya yooripelela?

• Itheneeri sipakiwe sai?

Okathi onipacerya ahu wunnuwa, ninnipaka makoho a itthu siniireya molumwenkuni.

• Xeeni itthu sootakhala siniireya aya?

• Xeeni atthu anikhwa aya?

Ankhi akhala wira waakhuliwa waya oniphwanyaneya mBiibiliyani?

Atthu anceene anihimya wira Biibiliya, eliivuru ya ihantisi ni itthu sowoothiwa, khonivareleya muteko aahiiso toovila omwiiwexexa. Masi niireke tthiri Biibiliya tooxankiha, wala enixankiha tiile atthu yiiwale aya voohimya sa Biibiliya? Niireke awo ari mootothiwa?

Mwa ntakiheryo, Anamunceene anuupuwela wira Biibiliya onihimya wira Muluku toneettiha olumwenku. Nto niireke eyo ekeekhai? Olumwenku ola ti wootepexa otakhala! Woosareya mixankiho ni ohaawa, iretta ni okhwa, osikhini ni ihasara. Niireke Muluku oophenta tonikumiherya itthu iyo?

Munniphavela osuwela waakhuliwa wa makoho ala? Ele Biibiliya onihimya awe voohimya sa ole oneettiha olumwenku ola, pooti orukunuxa muupuwelo anyu!

Woonasa wene mooweha wira miruku siri ebroxura ela sinikhuma mBiibiliyani. Anamoona a Yehova annikupali wira Biibiliya ti eliivuru erina miruku soovareleya muteko. Miruku iyo ti soovareleya muteko mwaha woowi “supuxeriwé ni Muluku, khukhalihiwa wira sixuttiheke ekekhai, savanyiheke ale anvonya, sattaruxeke ale anttheka”. (2 Timótheyo 3:16, 17) Nto, etthu yooloka ekhanle anyu oopaka ori otokosa eliivuru eyo ya khalai masi enivareleya muteko olelo-va!