Handurawa ini nga sitwasyon: Nagdadrayb hi David ha lugar nga diri na pamilyar ha iya. An mga karatola ngan palibot nagpapakita nga iba na nga lugar an iya nahingadtoan. Nasantop ni David nga nawawara hiya. Posible nga nagsayop hiya pagliko han nagbibiyahe hiya.

Kon ikaw hi David, ano an imo bubuhaton?

May-ada ka pipira nga opsyon:

1. Pamakiana para hin direksyon.

2. Gamit hin mapa o GPS.

3. Padayon nga magdrayb, ngan paglaom nga mabilngan an husto nga dalan.

Matin-aw, an Opsyon C diri makakabulig.

May bentaha an Opsyon B ha Opsyon A. An mapa ngan GPS makakabulig ha paggiya ha imo ha biyahe.

Ha pariho nga paagi, an Biblia makakabulig ha imo.

Ini nga libro mahimo

• maggiya ha imo ha pag-atubang ha mga problema

• bumulig ha imo nga makilala an imo kalugaringon ngan magin mas maopay nga tawo

• bumulig ha imo nga magkaada pinakamaopay nga kinabuhi

Tikang han nahibaro kita pagyakan, damu an aton pakiana.

• Kay ano nga asul an langit?

• Paonan-o ginhimo an mga bitoon?

Samtang nagkakaedad kita, nagpapakiana kita mahitungod han aton palibot.

• Kay ano nga may maraot nga nahitatabo?

• Kay ano nga namamatay an mga tawo?

Ano daw la kon aada la ha Biblia an baton hito nga mga pakiana?

Damu an nasiring nga an Biblia puno hin susmatanon, daan na, o makuri hinduro masabtan. An Biblia gud ba an problema, o an hinbabatian han mga tawo mahitungod ha Biblia? Posible ba nga sayop nga impormasyon an ira nabatian?

Pananglitan, may mga tawo nga naghuhunahuna nga an Biblia nasiring nga an Dios an nagkukontrol han kalibotan. Pero paonan-o ito mahitatabo? Masamok hinduro an kalibotan! Puno ito hin kasakit ngan pag-antos, sakit ngan kamatayon, kapobrehan ngan kalamidad. Salit, paonan-o masisiring nga an mahigugmaon nga Dios an responsable hini ngatanan?

Karuyag mo ba hibaroan an baton? Bangin mahipausa ka han baton han Biblia kon hin-o an nagkukontrol han kalibotan!

Bangin naobserbaran mo nga an sagdon nga mababasa dinhi hini nga brosyur basado ha Biblia. An mga Saksi ni Jehova kombinsido nga an Biblia amo an masasarigan nga gintitikangan han giya. Tungod ito kay an Biblia “giniyahan han Dios ngan mapulsanon ha pagtutdo, ha pagsaway, ha pagtadong.” (2 Timoteo 3:16, 17) Salit maopay gud nga usisahon mo ini nga libro nga maiha na nga iginsurat kondi mapulsanon pa gihap tubtob yana!