Aganicisye ayi: Tujile kuti mnyamata jwine lina lyakwe David akwenda cilo. Nambo ligongo lya cipi, akusimonga kuti akopocele kumalo gacilendo. Jwalakwe ayiweni kuti asokonecele. Komboleka kuti ŵakotele pakulemweceka.

Yikaŵe kuti wawojo ali David, ana akatesile yatuli?

Akasagwile kutenda ayi:

1. Kum’wusya mundu litala lyakuja kwika kwakwawulako.

2. Kamulicisya masengo toci.

3. Kwambaga kwenda, ali mganisya kuti cakakopocele kwakwawulako.

Mwangakayicila, kusagula kutenda yayili pa C mpaka kuŵe kwangakamucisya.

Kusagula yayili pa B kuli kwakamucisya mnope kulekangana ni kum’wusya mundu. Ligongo mundu jwampaka am’wusyejo mpaka alekangane najo, nambo tocijo cajijigale kulikose kwakwawula.

Baibulo nombe najo mpaka jalongoleleje kulikose kwakwawula!

Baibuloji mpaka

• jakamucisye kumalana ni yakusawusya

• jakamucisye kuti akole ndamo syambone

• jakamucisye kumanyilila yampaka atende kuti yindu yajendeleje cenene

Patwagambile kutanda kuŵeceta, twawusyaga yiwusyo.

• Ligongo cici lyuŵa lyangaŵala cilo?

• Ana ndondwa sipali silingwa kwinani?

Patwakusile, twatandite kuwusya yiwusyo yakusosekwa mnope.

• Ligongo cici yindu yakusakala yikutendekwa?

• Ligongo cici ŵandu akuwaga?

Tuli tusasile kuti kwanga kwa yiwusyoyi kuŵele kuli mkusimanikwa m’Baibulo, ana mpaka atende cici?

Ŵandu ŵajinji akusati Baibulo jigambile kuŵa buku jakulemba ŵandu basi, soni jandakatulo. Akusatisoni ngani syakwe sili syacikala, syakusawusya kusipikanicisya. Ana pelepa cakulemweceka ni cici, Baibulo kapena yaŵapikena ŵandu pakwamba ya Baibulojo? Kapena ŵanduwo akusaganisya m’yoyo ligongo lyakuti ŵane ŵasalile yaunami pakwamba ya Baibulo?

Mwacisyasyo, ŵandu akusati Mlungu ni jwakulamulila cilamboci. Ana yeleyi yili yisyene? Pacilambopa pakutendekwa yindu yakusakala mnope! Ŵandu akusimana ni yipwetesi yejinji, akulwala soni kuwa, akulaga ni usawuci soni ngosi syacipago. Ana Mlungu jwacinonyelo mpaka atendekasyeje yakusawusya yosopeyi?

Ana mpaka asacilile kupata kwanga kwa yiwusyoyi? Yajikusasala Baibulo pakwamba ya jwakulamulila cilamboci mpaka yasimonjesye!

Ngatukukayicila kuti yalijiganyisye m’kabukuka ayiweni kuti yikutyocela m’Baibulo. Ŵamboni sya Yehofa akusakulupilila kuti Baibulo jikusasala yindu yakamucisya mnope. Akusakulupilila yeleyi ligongo maloŵe gakwe ‘gasaliligwe ni Mlungu, nipo gakusakamucisya pakwiganya yindu yisyesyene, kulekasya ulemwa, kongolela yangalumbana.’ (2 Timoteo 3:16, 17) Wawojo pajika akusosekwa kulijiganya Baibuloji.