DEER 10
Uw Rogon Nrayog ni Nge Ayuwegeg e Thin nu Bible?
MANG E GA RA RIN’?
Mu susunnag e re n’ey: Be yan David u lan reb e binaw nnep’. Bochan ni ke aw e lumor ma aram e dabkiyog ni nge guy e gin be sor ngay, ma aram me nang ni ke malog. Ba mudugil nde puluw e kanawo’ ni ke yan riy.
Faanra gur David, ma mang e ga ra rin’?
MU TAL NGAM LEM!
Baaray boch ban’en nrayog ni ngam rin’:
-
Mu fith ku be’ ko uw e ngam sor ngay.
-
Mu fek e dengki.
-
Kag be yan ni ga be athapeg ni ngam pirieg e gin ni ga be sor ngay.
Ba mudugil ni bin dalip e rayog ni nge yib buchuuw angin.
Machane bin l’agruw e kab fel’ ko bin som’on, ya ba mudugil ni ga be yan ni kam fek e dengki ya nge gal’ e kanawo’ rom.
Aray rogon nrayog ni nge ayuwegem e thin nu Bible!
Re ke babyor ney e rayog ni nge
-
pow’iyem u fithik’ e pi magawon ni ga be mada’nag
-
ayuwegem ni ngam nang boch ban’en u rarogom, mag mang be’ nib manigil
-
dag ngom rogon ni nge yag e bin th’abi fel’ e yafos ngom
FULWEG U BOCH E DEER NIB GA’ FAN
Nap’an ni kad nanged e thin ma gad tabab i fith e deer.
-
Mang fan nib raen mak’ef lan e lang?
-
Mang e kan ngongliy e pi t’uf riy?
Boch nga tomuren ma gad tabab i fith boch e deer u murung’agen e pi n’en be buch u toobdad.
Uw rogon ni faanra kab kafram i yib ni bay e fulweg ko pi deer ney u Bible?
Boor e girdi’ ni yad ma yog ni thin nu Bible e yigoo bogi yat, ara daki m’ag ko par rodad e ngiyal’ ney, ara ba mo’maw’ ni ngan nang fan. Machane gur, riyul’ ni thin nu Bible e ir tapgin e re magawon ney, fa n’en ni be rung’ag e girdi’ u murung’agen e Bible? Gur, gathi de puluw e n’en ni yibe yog ngorad?
Bod ni, ma lemnag e girdi’ ni be yog e Bible ni Got e be gagiyegnag e fayleng. Machane uw rogon ni nge buch ban’en ni aray rogon? Ya re fayleng ney e ke gel e wagey riy! Ke sug ko amith, gafgow, m’ar, yam’, uyungol nge boch ban’en ni be k’aring e gafgow ko girdi’. Uw rogon ni nge k’aring ba Got ni ma t’ufegey boch ban’en ni nge buch ni aray rogon?
Ga baadag ni ngam nang e fulweg ko re deer ney? Sana ga ra gin ko en be yog e Bible ni ir e be gagiyegnag e fayleng!
Ba mudugil ni kam guy ni pi fonow u lan e re ke brochure ney e be tor nga daken e thin nu Bible. Ba mich u wan’ e Pi Mich Rok Jehovah ni thin nu Bible e rayog ni nge pagan’uy ngay ni nge pow’iyey. Re n’ey e bochan e “Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’.” (2 Timothy 3:16, 17) Ba t’uf ni ngam fil e n’en be yog e re ke babyor ney ni ke kakrom, machane kab m’ag ko par rodad e ngiyal’ ney!