Yehova Mungu tie Jacwic mwa. En re m’ecwio piny ceke; piny ma waneno ku ma waneno ngo de. I wang’ nicwio piny ma wabed waneno, elar ecwio jumalaika dupa. Nyo, ing’eyo nia jumalaika gitie jukani? Jumalaika gitie jutic pa Yehova. Ecwiogi ku kum mi tipo calu en. Wacopo nenogi ngo, tap calu ma wacopo neno ngo Mungu. Malaika ma kwong’a ma Yehova ular ucwio udok ukonye i tic ma tung’ tung’. Malaikane ukonyo Yehova kinde m’ebecwio nyikaluku man piny mange; pinyne moko tie ng’om ma tie kabedo mwa ma leng’ akeca.

I ng’eye, Yehova uyiko ng’om kara lei man dhanu gikwo i wie. Eketho ceng’ ucaku rieny iwi ng’om. Etimo gudi, nam man kulo.

Lembang’o m’udok utimere? Yehova uyero kumae: ‘Abiketho ng’om utwi lum, uboko, man yen.’ E yen ma tung’ tung’ ma cego nying’gi ucaku nitwi, man dek ma col ku thiwe de. I ng’eye, Yehova ucwio lei ma tung’ tung’: moko tie ma kwang’ i pii, ma wotho awotha, ma wol ku korgi man winyo ma tuk i kor polo. Leine moko tie thindho, ku lapor afoyo, mange ke dongo, ku lapor liec. In imaru lei ma kani nisagu?

I ng’eye Yehova uyero ni malaika m’ecwio ma kwong’a kumae: ‘Dong’ wacwii dhanu.’ Mungu ucwio dhanu i ayi m’ukoc ku lei. Ecwiogi ku copo mi yiko piny, mi weco, mi ng’iero man mi  rwo. Bende emio igi tic mi gwoko ng’om man lei. Nyo, ing’eyo nia jukani ma gibino dhanu ma kwong’a? Wakenen ponji m’ulubo.