Jehová Diosaw lurawayistu. Jupaw taqe kunsa luräna: uñjktan ukanaksa, jan uñjktan ukanaksa jupaw luräna. Uñjktan ukanak janïr lurkasajja, walja angelanakwa luräna. ¿Khitinakäpjjes angelanakajja? Diosan servirinakapäpjjewa, Diosar uñtasit luratäpjjarakiwa. Jiwasajj janiw Jehová Diosar uñjksnati, ukhamajj janirakiw angelanakarus uñjksnati. Diosan nayrïr lurat angelapajj jupan yanapiripänwa. Uka angelaw Jehová Diosarojj warawaranaksa yaqha ukhamanaksa lurañ yanaptʼäna. Jupampiw aka suma oraqsa lurapjjäna.

Jehová Diosajj animalanakana ukhamarak jaqenakana jakasipjjañapatakiw aka oraqe sum wakichäna. Intimpiw oraqjjar qhantʼayanïna. Qollunaka, qotanaka, jawiranak luräna.

¿Kunsa ukjjar luräna? Jehová Diosajj akham sänwa: ‘Oraqejj kunayman chʼojjña alinaka, plantanaka, arbolanak jilaypan’ sasa. Ukatwa aka oraqenjja kunayman frutanaka, verduranaka, ukhamarak panqaranakajj jilantäna. Jehová Diosajj kunayman animalanakwa lurarakïna: altnam jalnaqerinaka, uman jakirinaka, oraqen qatatnaqtirinaka. Jehová Diosajj wankʼur uñtat jiskʼa animalanaka, elefantjam jachʼa animalanaka luräna. ¿Jumar kawkïr animalas gusttamjja?

Ukatsti Jehová Diosajj uka nayrïr angelarojj akham sänwa: ‘Jaqer lurañäni’ sasa. Jaqenakajj janiw animalanakjam luratäpkiti. Jupanakajj amuytʼasis kuns luriri, parliri, lartʼasiri, Diosarus orasiri ukham  luratäpjjewa. Jupanakaw aka oraqsa animalanaksa cuidapjjañapäna. ¿Kamsatänsa nayrïr jaqejj uk yattati? Jichhajj uk yateqañäni.