An Diyos na Jehova an satuyang Kaglalang. Ginibo niya an gabos na bagay—mga bagay na nahihiling pati mga bagay na dai nahihiling. Bago niya ginibo an mga bagay na nahihiling ta, naggibo nguna siya nin dakulon na anghel. Aram mo kun ano an mga anghel? An mga anghel mga lingkod ni Jehova. Arog niya, dai ta sinda nahihiling. An inot na anghel na linalang ni Jehova nagin katabang niya. Tinabangan siya kan anghel na iyan kan gibuhon niya an mga bituon, mga planeta, asin iba pang mga bagay. An saro sa mga planetang iyan iyo an daga, an satong magayon na istaran.

Pagkatapos, ihinanda ni Jehova an daga para maistaran nin mga hayop saka tawo. Pinasirang niya sa daga an liwanag kan saldang, o aldaw. Naggibo siya nin mga bukid, mga dagat, saka mga salog.

Ano an sunod na nangyari? Si Jehova nagsabi: ‘Magibo ako nin mga duot, * mga tinanom, asin mga kahoy.’ Tapos, nagpuon na magtubo an dakul na iba-ibang klase nin mga burak, mga gulay, asin mga kahoy na nagbubunga. Dangan ginibo ni Jehova an gabos na hayop—mga hayop na naglalayog, naglalangoy, nagkakamang, asin nagkakanap. Naggibo siya nin saradit na hayop, arog kan mga kuneho, asin naggibo man siya nin darakula, arog kan mga elepante. Ano an pinakagusto mong hayop?

Dangan sinabi ni Jehova sa inot na anghel: “Gibuhon niyato an tawo.” Iba an mga tawo sa mga hayop. Kaya nindang mag-imbento  nin mga bagay. Tatao sindang magtaram, mamibi, asin magngisi. Sinda an maataman sa daga asin sa mga hayop. Aram mo kun siisay an pinakainot na tawo? Hilingon ta.