Osanobua ne Jehova ọre Ayi ọghomwa. Irẹn ẹre ọ yi emwi hia ne ima bẹghe kevbe ne ima i bẹghe. A te miẹn wẹẹ ọ suẹn gha yi emwi hia ne ima bẹghe, ọ keghi yi avbe odibosa nibun. U rẹn emwa ne avbe odibosa khin ra? Iran keghi re emwa ne Jehova yi, nọ vbe yevbe na ghee irẹn. Ma i sẹtin bẹghe iran vbene ima i vbe sẹtin bẹghe Osanobua. Odibosa nokaro ne Jehova yi na do gha ru iyobọ ne Jehova. Odibosa nii ẹre ọ ghi ru iyobọ ne Jehova ya yi avbe orhọnmwẹ, e planẹt, kevbe emwi hia nikẹre. Ọkpa vbe planẹt ne Osanobua yi keghi re uhunmwu otagbọn na, ne ima ye.

E Jehova na do mwamwa uhunmwu otagbọn na, ne emwa nagbọn kevbe avbe aranmwẹ mieke na sẹtin gha rrọọ. Irẹn keghi ru ẹre, ne ovẹn gha yunmwu sẹ uhunmwu otagbọn. Ọ na vbe yi oke, okun kevbe ẹzẹ.

Vbe iyeke ọni, e Jehova keghi kha wẹẹ: ‘I gha ru ẹre ne avbe irunmwu, emwi okọ kevbe erhan zọọ ladian.’ Ẹre ọmọ erhan ughughan, emwi okọ kevbe avbe obobo na suẹn gha zọọ ladian. Iyeke ọni, e Jehova keghi yi avbe aranmwẹ ughughan​—⁠ke ni tin khian vbe iso, ke ni rre uwu ẹzẹ kevbe ni kọn khian vbe otọ. Ọ keghi yi aranmwẹ nọ kanmwa vbe na ghee ọfiontọ, ọ na vbe yi nọ kpọlọ vbe na ghee eni. De aranmwẹ nọ ghi yẹẹ ruẹ sẹ?

E Jehova na ghi tama odibo nokaro wẹẹ, gia do yi “emwa nagbọn.” Te emwa nagbọn ne irẹn khian yi na, khian lughaẹn ne avbe aranmwẹ. Iran ghi sẹtin gha kun emwi ọgbọn. Iran ghi sẹtin gha guan, iran  ghi sẹtin gha giẹ, iran ghi vbe sẹtin gha na erhunmwu. Iran ẹre ọ khian vbe gha gbaroghe uhunmwu otagbọn na kevbe avbe aranmwẹ ni rrọọ. Uwẹ rẹn ọmwa nokaro ne Osanobua yi ra? Ma gha ruẹ ọre vbe iruẹmwi nogieva.