Yéhôva Zambe nnye a ne Nté wongan. A nga té biôm bise, biôm bi ne yen a mis, a biôm bi se ngule ya yen. Ôsusua na a té biôm bi ne ngule ya yen a mis, a nga taté té abui beéngele. Ye wo yem beéngele? Beéngele be ne bôte Yéhôva Zambe a nga té ane émien. Bi se ngule ya yene be a mis, fo’o ve ane bi se ngule ya yene Zambe. Éngele ôsu Yéhôva a nga té a nga volô nye abui. A nga volô Yéhôva éyoñ a nga té ateté, beplanète, a biôm bise. Planète wua ya ba a nga té, a ne si, mbamba vôme bia nyiñe nyi.

Mvuse ya valé, Yéhôva a nga kôme si asu na bôt a betit be bo ngule ya nyiñ été. A nga té fe jôp asu na éfufub é bo si. A nga té minkôl, mañ, a asôé.

Mvuse ya valé a nga bo jé? Yéhôva a nga jô na: ‘Ma zu bo bilok a bilé.’ Éyoñ éte nje bibuma mevale meval, bilok a mesam bi nga taté na bia faa. Ane Yéhôva a nga té fe betit mevale meval, ba ba yele yôp, ba ba jok, ba ba woñ, ba ba vutan, a ba ba bete bilé. A nga té betit be ne betyôtyoé ane édu, a ba be ne menen ane zok. Tit évé wo dañe nye’e?

Éyoñ a maneya kôme biôm bite bise, Yéhôva a nga jô éngele ôsu na: “Bi tame bo môt.” A nga bo na môt ba tit be selan. A nga té môt a ngule ya kôme biôm. Môt a ne ngule ya kobô, e woé, a ye’elan. Bôt be mbe be yiane ba’ale si a betit be mbe été. Ye wo  yeme môt ôsu Zambe a nga té e si va? Kabetôlô a tôñe valé a zu bia de kat.