Jehova Gott isch üse Schöpfer. Er het alles gmacht: alles, wo mir gsehnd, und alles, wo mir nid chönnd gseh. Bevor er di Sache gmacht het, wo mir gsehnd, het er vil, vil Engel erschaffe. Weisch du, was Engel sind? Engel sind Persone, wo ähnlich sind wie Jehova. Mir chönnd si nid gseh, eso wie mir au Jehova nid chönnd gseh. De erscht Engel, wo Jehova erschaffe het, wird sin Helfer. Dee Engel het Jehova ghulfe, alli Sterne z mache, Planete und alles anderi im Weltall. Eine vo dene Planete isch üses wunderschöne Dehei, d Erde.

Jehova het d Erde eso vorbereitet, dass d Mensche und d Tier druf chönnd lebe. Er laat d Sunne uf d Erde schiine. Und er macht d Berge, d Flüss und s Meer.

Was passiert jetzt? Jehova seit: «Ich mache Gras, Pflanze und Bäum.» Denn het ganz vil agfange wachse: Frücht und Gmües und vil verschideni Blueme. Jetzt macht Jehova alli Tier: Tier, wo flüged, schwimmed, chrabbled und chrüched. Er macht chliini Tier wie s Häsli und grossi Tier wie de Elefant. Weles isch dis Lieblingstier?

Jehova seit jetzt zum erschte Engel: «Chumm, mir mached Mensche.» D Mensche sötted andersch sii als d Tier. Er wett, dass si chönnd Sache erfinde. Si sötted chönne rede, lache und bete. Und si sötted zu de Erde und zu de Tier luege. Weisch du, wer de erscht Mensch isch? Das gsehnd mir als nöchschts.