Jehovah Jiwheyẹwhe wẹ Mẹdatọ mítọn. Ewọ wẹ dá nulẹpo, nuhe mí nọ mọ po nuhe mí ma sọgan mọ lẹ po. Whẹpo e do dá nuhe mí gán mọ lẹ, e ko dá angẹli susu. Be a yọ́n mẹhe nkọ angẹli lẹ yin ya? Nudida delẹ wẹ yé yin he Jehovah dá to apajlẹ ede tọn mẹ. Mí ma sọgan mọ yé, dile mí ma sọgan mọ Jiwheyẹwhe do. Angẹli tintan he Jehovah dá wá lẹzun alọgọtọ etọn. Angẹli enẹ gọalọna Jehovah to whenue e dá sunwhlẹvu lẹ, planẹti lẹ gọna nuhe pò lẹpo. Dopo to planẹti enẹlẹ mẹ wẹ aigba, yèdọ ofi dagbedagbe he mí to gbẹnọ te.

Enẹgodo, Jehovah jla nulẹ do to aigba ji, na kanlin lẹ po gbẹtọvi lẹ po nido nọ nọ̀ e ji. E hẹn ẹn yọnbasi na owhè nado nọ họ́n do aigba ji. E dá osó lẹ, ohù lẹ po tọ̀sisa lẹ po.

Etẹwẹ bọdego? Jehovah dọmọ: ‘Todin, n’na dá ogbé-mú, podọ atin he nọ de okún tọ́n lẹ gọna atin lẹ.’ Atin-sinsẹ́n wunmẹ voovo lẹ, omá lẹ po vounvoun lẹ po sọ jẹ wúwú ji. Enẹgodo, Jehovah dá kanlin wunmẹ voovo lẹpo—yèdọ dehe nọ zlọn lẹ, dehe nọ lìnsin lẹ po dehe nọ lìn gbọn aigba lẹ po. E dá kanlin he whè taidi azui nkọ lẹ, podọ dehe klo taidi ajinnakú nkọ lẹ. Kanlin tẹwẹ a yiwanna hugan?

Enẹgodo, Jehovah dọna angẹli tintan lọ dọmọ: “Gbọ mí ni basi gbẹtọ.” Gbẹtọ lẹ na gbọnvona kanlin lẹ. Yé na do nuyọnẹn nado  nọ de nuyọyọ lẹ tọ́n. Yé sọgan dọho, konu bo hodẹ̀. Yé na nọ penukundo aigba po kanlin lẹ po go. Be a yọ́n mẹhe yin gbẹtọ tintan lọ ya? Gbọ mí ni pọ́n.