Si Jehova nga Dios ang aton Manunuga. Sia ang naghimo sang tanan nga butang, makita man naton ukon indi makita. Antes niya ginhimo ang mga butang nga makita naton, ginhimo niya ang madamo nga anghel. Kabalo ka bala kon ano ang mga anghel? Mga persona sila nga ginhimo ni Jehova. Indi naton sila makita, pareho nga indi man naton makita ang Dios. Ang una nga anghel nga ginhimo ni Jehova nagbulig sa iya. Ginbuligan niya si Jehova sa paghimo sang mga bituon, mga planeta, kag iban pa nga butang. Ang isa sa mga planeta nga ginhimo nila amo ang duta—ang aton matahom nga ginaistaran.

Dayon ginpreparar ni Jehova ang duta para istaran sang mga sapat kag mga tawo. Ginhimo niya ang adlaw para magsanag ang duta. Ginhimo niya ang mga bukid, mga dagat, kag mga suba.

Ano dayon ang natabo? Si Jehova nagsiling: ‘Mahimo ako sang hilamon kag mga tanom kag mga kahoy.’ Gani may mga prutas, mga utanon, kag mga bulak. Sunod, ginhimo ni Jehova ang tanan nga sapat—mga sapat nga nagalupad, nagalangoy, kag nagakamang. Ginhimo niya ang gamay nga mga sapat pareho sang mga kuneho, kag daku nga mga sapat pareho sang mga elepante. Ano gid ang nanamian mo nga sapat?

Dayon nagsiling si Jehova sa una nga anghel: “Mahimo kita sing tawo.” Lain gid ang mga tawo sa mga sapat. Makahimo sila  sing bag-o nga mga butang. Makahambal sila, makakadlaw, kag makapangamuyo. Sila ang magaatipan sang duta kag sang mga sapat. Kabalo ka bala kon sin-o ang una nga tawo? Tan-awon ta.