Jehova Mukuru Omuute wetu. Eye wa uta oviṋa avihe mbi munika na mbi ha munika. Ngunda e hi ya ungura oviṋa mbi munika, eye wa ungura ovaengeli ovengi tjinene. Mo tjiwa kutja ovaengeli ovangendu? Owo ovandu Jehova mba ungura nu mbe ri tjimuna ye omuini. Eṱe katu ve munu tjimuna tji tu ha munu Mukuru. Omuengeli omutenga Jehova ngwa ungura wa rira omuungure wapamwe na ye. Omuengeli ngwi wa vatera Jehova indu tjaa ungura ozonyose, ozoplaneta noviṋa avihe vyarwe. Oplaneta imwe ndja ungurwa, ehi, noro omaturiro wetu omawa.

Okuzambo Jehova wa rongerisa ehi kovipuka novandu okutura mo. Eye wa ungura eyuva kutja ri ete ondjerera kombanda yehi. Eye wa ungura ozondundu, omironga nozonḓonḓu.

Okuzambo pa tjitwa tjike? Jehova wa tja: ‘Ami me ungura omahozu nomiti pekepeke.’ Ovihape, ovikunwa ovingi pekepeke novimbloma vya uta okuhapa. Okuzambo Jehova wa ungura ovipuka, tjiva mbi tuka, mbi tjaara, mbi kokozoka na mbi honahona. Eye wa ungura oupuka ouṱiṱi tjimuna oupi novinene tjimuna ozondjou. Ove wa suvera otjipuka tjiṋe?

Okuzambo Jehova wa tja nai komuengeli ingwi omutenga: ‘Ngatu ungure ovandu.’ Owo kave nokukara tjimuna ovipuka. Mave yenene okuungura oviṋa, okuhungira, okuyora nokukumba.  Owo mave tjevere ehi novipuka. Mo tjiwa kutja omundu omutenga wa ri uṋe? Ngatu tare pamwe.