Yeova Ngai nĩwe Mũmbi waitũ. Nĩwe woombie syĩndũ yonthe, ila syonekaa na ila itonekaa. Ĩndĩ atambĩte kũmba syĩndũ ila syonekaa, ambie kũmba alaĩka aingĩ mũno. We nĩwĩsĩ alaĩka naaũ? Nĩ athũkũmi ma Yeova. Methĩawa mailye o take. Tũyĩsa kũmona o tondũ tũtesa kũmwona Ngai. Mũlaĩka wa mbee ũla Yeova woombie atwʼĩkie mũtetheesya wake. Mũlaĩka ũsu nĩwamũtetheeisye Yeova yĩla woombaa ndata, na syĩndũ ila ingĩ syonthe. Nthĩ nĩ ĩmwe katĩ wa syĩndũ isu ingĩ woombie, na amyũmbie yĩ mbanake mũno kwondũ witũ.

Ĩtina wa kũmyũmba, Yeova nĩwamĩseũvisye nĩ kana yĩthĩwe ĩtonya kwĩkala nyamũ na andũ. Nĩwasyokie aseũvya kyeni kya syũa nĩ kana kĩmulĩkae nthĩ. Na ĩndĩ oomba iĩma, ũkanga na mbũsĩ.

Asyokie eeka ũndũ ũngĩ wĩva? Yeova aisye atĩĩ: ‘Nĩngũmesya nyeki, mĩtĩ na syĩndũ ingĩ ila imeaa ĩũlũ wa nthĩ.’ Aasya ũu, mĩtĩ ya matunda me kĩvathũkanyʼo, mbaa mboka, na malaa, nĩsyambĩĩie kũmea. Ĩtina wa vau Yeova nĩwoombie nyamũ syĩ kĩvathũkanyʼo, ta ila siũlũkaa, ila ithambĩaa, na ila iendaa ĩũlũ wa nthĩ. Oombie tũsamũ tũnini ta tũvĩla na oomba nyamũ ingĩ nene ta nzou. We wendete nyamũ yĩva?

Ĩtina wa kwĩka maũndũ asu eeie ũla mũlaĩka wa mbee atĩĩ: “Nĩtũmbe mũndũ.” Andũ asu moombwa mesaa kwĩthĩwa me kĩvathũkanyʼo vyũ na nyamũ. Maĩ matonya kũseũvya syĩndũ itaaoneka.  O na maĩ matonya kũneena, kũtheka, na kũvoya. Na eka ũu, nĩmo maaĩlĩte kũsũvĩa nthĩ na nyamũ. Nĩwĩsĩ mũndũ ũla woombiwe mbee aĩ ũũ? Kwaeka twone.