Jeová Deus é nos Kriador. El faze tudu kuza, kes ki nu ta odja i kes ki nu ka ta odja. Antis di el faze kes kuza ki nu ta odja, el faze un monti anju. Bu sabe anjus é kenha? Anjus é algen ki Jeová faze ki ta parse ku el. Nu ka ta pode odja-s sima nu ka ta pode odja Deus. Primeru anju ki Jeová faze bira se ajudanti. Kel anju li djuda Jeová faze strélas i tudu otus kuza. Un di kes kuza é Téra, ki é un kaza bunitu ki Jeová da-nu.

Dipôs Jeová pripara Téra pa animal ku algen vive na el. El faze sól pa límia Téra. El faze montanhas i el faze mar ku rius.

Bu sabe kuzê ki kontise dipôs? Jeová fla: ‘N sta ben faze padja, plantas ku pé di arvis.’ Kumesa ta nase txeu tipu di flor, plantas i arvis ki ta da fruta. Dipôs Jeová faze tudu tipu di animal. Animal ki ta bua, ki ta nada, ki ta anda i ki ta rasta. El faze alguns animal pikinoti sima kuedju i otus grandi sima elifanti. Ki animal ki bu gosta más txeu?

Dipôs, Jeová fla kel primeru anju: ‘Nu ben faze ómi’. Ómis ta sérba diferenti di kes animal. Ómis ta pode inventaba kuzas. Es ta pode papiaba, ri i fazeba orason. Es ta pode kuidaba di Téra i di kes animal. Bu sabe ken ki éra primeru ómi? Nu ben odja.