Jehova Kalunga oye Omushiti wetu. Okwa shita oinima aishe oyo hatu dulu okumona naayo ihatu dulu okumona. Fimbo ina shita oinima oyo hai monika, okwa hangwa a shita ovaengeli vahapu. Mbela ou shii kutya ovaengeli ovo oolyelye? Ovaengeli ovanhu ovo va shitwa kuJehova ve na omalutu opamhepo ve mu fa. Ngaashi ashike ihatu dulu okumona Kalunga, navo ihava monika. Omweengeli wotete oo a shitwa kuJehova okwa li he mu kwafele. Okwa li a kwafela Jehova eshi a shita eenyofi, eepulaneta nosho yo oinima ikwao aishe. Imwe yomeepulaneta odo, oyo edu, olo li li eumbo letu liwa.

Konima yaasho, Jehova okwa wapaleka edu opo li dule okukalwa koinamwenyo nokovanhu. Opo nee okwa shita etango opo li yandje ouyelele kedu. Okwa shita yo eemhunda, efuta nomilonga.

Lwanima okwa ka shita vali shike? Jehova okwa ti: ‘Ohandi ka shita omwiidi, oimeno nomiti.’ Okudja opo, omiti doiimati, oikwambidi nosho yo eengala dihapu domaludi e lili noku lili oda li da hovela okumena. Opo nee Jehova okwa shita oinamwenyo, ngaashi oyo hai tuka, hai kala momeva, hai lipweda naayo hai ende. Okwa shita yo oinamwenyo inini naayo ya kula, ngaashi oondiba neendjaba. Oshinamwenyo shilipi u hole unene?

Jehova okwa lombwela omweengeli oo a shitwa tete a ti: “Tu meni ovanhu.” Ovanhu ova yooloka ko koinamwenyo molwaashi ohava dulu okweeta po oinima. Ohava dulu okupopya, okuyola nosho yo okwiilikana. Ohava dulu yo okufila oshisho edu noinamwenyo. Mbela ou shii kutya omunhu oo a shitwa  tete oye lyelye? Natu ka tale kwaasho.