Jehova Karunga yige Musiti gwetu. Age yige ga sita yininke nayinye, eyi atu mono neyi atu dili kumona. Komeho a site eyi atu mono, age kwa sitire vaengeli wovanzi unene. Ono diva asi wolye vaengeli ndi? Jehova kwa sita vaengeli va mu fane. Moomu atu dili kumona Karunga, vaengeli nawo kapi atu va mono. Jehova kwa sitire muengeli gokuhova ogu ga mu vaterere. Muengeli ogo kwa vaterere Jehova mokusita nombungururu ntani noyininke nayinye. Sininke simwe esi ga sitire kuna kara evhu, alyo embo lyetu lyewa.

Jehova kwa wapaikilire evhu yikorama novantu yipo va tunge po. Age kwa sita ezuva li temene pevhu. Ntani ga sita nondundu nomafuta nonomukuro.

Yininke musinke hena ga sita? Jehova kwa tanta asi: ‘Tani siti wayi noyitji peke-peke.’ Age kwa sita enyango lyokulisiga-siga noyikwahidi ntani nombya. Ntani kwa sita hena yikorama nayinye, eyi ayi tuka neyi ayi zogo momema ntani neyi yokuwovana. Age kwa sita yoyinunu, ngwendi vandimba, ano yoyinene ngwendi vanzovhu. Sikorama musinke wa hara unene?

Jehova kwa tanterere muengeli gokuhova asi: “Tu ungeni po nye vantu.” Vantu va lisiga noyikorama. Vantu kuvhura kurugana yininke. Awo kuvhura kuuyunga nokuzora ntani nokukanderera. Kwa va sitire va pakere mbili evhu noyikorama. Ono diva asi yilye muntu gokuhova va sitire ndi? Tatu ka gwana elimbururo mosirongwa sokukwama ko.