Yaˬhoˉvaˬ Gʼuiˬ sha ngaˬ hui ve te hpanˍ shehˍ hpaˇ hpehꞈ ve yoˬ. Ngaˬ hui mawˬ gʼa ve leh maˇ mawˬ gʼa ve hkʼa peu˗eˬ yawˇ te hpanˍ taˍ ve yoˬ. Mawˬ hpehꞈ ve awˬ ceuˬ maˇ te hpanˍ sheˍ htaˇ, maˇ jaˇ ve mvuhˇ naw ma tcuh yaˇ htaꞈ te hpanˍ ve yoˬ. Yawˇ hui a shu le shiˍ˗aˬ laˇ? Yawˇ hui Yaˬhoˉvaˬ ve awˬ hoꞈ awˬ han hkʼa shuˍ cawˬ ve yoˬ. Ngaˬ hui Gʼuiˬ sha htaꞈ maˇ mawˬ gʼa ve hkʼa shuˍ, yawˇ hui htaꞈ kaꞈ ngaˬ hui maˇ mawˬ gʼa. Yaˬhoˉvaˬ mvuhˇ naw tcuh yaˇ awˉ lawˉ teˇ gʼaˇ te hpanˍ leh, yawˇ Yaˬhoˉvaˬ htaꞈ ga piˇ shehˍ hpaˇ hpehꞈ la ve yoˬ. Yaˬhoˉvaˬ meuꞈ keu shiˍ leh awˬ kaˍ awˬ nu hkʼa peu˗eˬ htaꞈ te hpanˍ htaˇ, mvuhˇ naw ma tcuh yaˇ chi teˇ gʼaˇ yawˇ htaꞈ ga piˇ ve yoˬ. Yaˬhoˉvaˬ miˬ guiˬ chi htaꞈ kaꞈ te hpanˍ leh, ngaˬ hui awˬ pon daꞈ jaˇ ve chehˇ kuiˬ hpehꞈ la piˇ ve yoˬ.

Oˇ ve hkʼawꞈ nawˉ, to nuˇ to shaˆ leh chaw yaˇ chehˇ gʼa tuˬ, Yaˬhoˉvaˬ miˬ guiˬ gu teh taˍ laˇ ve yoˬ. Miˬ guiˬ hkʼoˆ mvuhˇ cha cha la piˇ leh hkʼaw pui, laˇ tsuhˇ gʼuiˬ, iˉ kaˆ lawˬ cawˬ la tcuh ve yoˬ.

Yawˇ aˬ htoꞈ ma kʼawꞈ te hpanˍ sheˍ ve le? Yaˬhoˉvaˬ kʼoˆ ve, ‘mvuhꞈ, gʼawˇ hpaꞈ mvuhˬ naweh, suhˆ cehˬ teˇ hpaˍ ngaˬ te hpanˍ tuˬ yoˬ.’ Iˉ shiˍ, gʼawˇ caˉ, suhˉ veˆ maˬ veˆ laiˉ ceuˬ kaꞈ cawˬ la ve yoˬ. Peuˬ leh poˬ puiˉ ve, iˉ kaˆ hkʼaw chehˇ ve, loˇ kʼai gaˆ kʼai puiˉ ve to nuˇ to shaˆ teˇ hpaˍ htaꞈ Yaˬhoˉvaˬ te hpanˍ ve yoˬ. To nuˇ to shaˆ uiˍ ve i ve, tawˇ pa haˉ te kʼo haw kʼuˉ pui leh pa taiˇ kaꞈ te hpanˍ ve yoˬ. Nawˬ to nuˇ to shaˆ hkʼaˬ ve teˇ ceuˬ htaꞈ dawˇ cawˇ jaˇ ve le?

Peuˬ hkʼawꞈ nawˉ, mvuhˇ naw ma tcuh yaˇ awˉ lawˉ teˇ gʼaˇ htaꞈ Yaˬhoˉvaˬ kʼoˆ piˇ ve, ‘ngaˬ hui chaw yaˇ htaꞈ te hpanˍ˗a veuˬ.’ Chaw yaˇ to nuˇ to shaˆ htaꞈ maˇ shuˍ. Chaw yaˇ laiˉ ceuˬ te tawˆ la gʼa ve yoˬ. Yawˇ hui tawˇ yaw puiˉ ve,  gʼuiˬ puiˉ ve, bon lawˬ puiˉ ve yoˬ. Yawˇ hui miˬ guiˬ leh to nuˇ to shaˆ htaꞈ nyi haꞈ shaˉ tuˬ yoˬ. Chaw yaˇ awˉ lawˉ teˇ gʼaˇ a shu hpehꞈ ve le nawˬ shiˍ˗aˬ laˇ? Teˇ geh nyi sheˍ.