Jehova Mulimu ki Mubupi waluna. Ki yena yabupile lika kaufela zelukona kubona ni zelusa koni kubona. Pili asika bupa kale lika zelukona kubona, naabupile mangeloi amañata-ñata. Kana mwaziba mwainezi mangeloi? Mangeloi ki libupiwa za moya zabupile Jehova ili zeswana ni yena. Halukoni kuabona, sina feela halusa koni kubona Mulimu. Lingeloi lapili lanaabupile Jehova neli lona mutusi wahae. Lingeloi leo nelitusize Jehova hanaabupile linaleli, lipulaneti, ni lika zeñwi kaufela. Yeñwi ya lipulaneti zeo, ki lifasi, ili lihae laluna lelinde.

Mi Jehova abupa lifolofolo ni batu fa lifasi. Mi abupa lizazi ili kutahisa kuli kube ni liseli fa lifasi. Hape abupa malundu, mawate, ni linuka.

Ki lika mañi zanaaezize hasamulaho? Jehova ali: ‘Nikamelisa bucwañi, limela, ni likota.’ Mi kwakala kuba ni miselo, miloho, ni lipalisa za mifuta-futa. Hasamulaho, Jehova aeza lifolofolo kaufela—ili zefufa, za mwa mezi, zehohoba, ni zezamaya. Aeza zenyinyani zecwale ka tushakame, ni zetuna zecwale ka litou. Ki ifi folofolo yemulata hahulu?

Mi cwale Jehova abulelela lingeloi lapili lanaabupile kuli: “Halueze mutu.” Batu nebaka shutana ni lifolofolo. Nebaka kona kupanga lika. Nebaka kona kubulela, kuseha, ni kulapela. Nebaka  babalela lifasi ni lifolofolo. Kana mwaziba mutu wapili yanaabupilwe? Haluboneñi.