Jeova Anij ej Rũkõm̦anm̦an eo ad. Ear kõm̦anm̦an men otemjej, men ko jej loi im men ko jejjab maroñ loi. M̦okta jãn an kar kõm̦m̦ani men ko jej loi, ear kõm̦m̦an bwijin bwijin enjel̦. Kwõjel̦ã ke ta in enjel̦? Jeova ear kõm̦m̦an bwe enjel̦ ro ren ãinwõt e. Jejjab maroñ lo enjel̦ rein ãinwõt ad jab maroñ lo Anij. Enjel̦ eo m̦oktata Jeova ear kõm̦m̦ane, ear jipañ Jeova kõm̦anm̦an men otemjej. Enjel̦ in ear jipañ Jeova ke Ear kõm̦m̦ane iju ko, bũl̦ãnet ko, im aolep men ko jet. Juon iaan bũl̦ãnet kein ej lal̦ in, ijin jikid me eaiboojoj.

Innem Jeova ear jino an kõpooje lal̦ in bwe en jikin menninmour ko im armej ro. Ear kõm̦m̦an bwe al̦ en kameram lal̦ in. Im ear kõm̦m̦ane tol̦ ko, lo̦jet, im reba ko.

Bar ta ko jet Jeova ear kõm̦m̦ani? Ear ba: ‘Inaaj kaddek ujooj, wõjke, im mennin eddek ko jet.’ Innem ear jino eddek bwijin kain leen wõjke ko, bõlõk ko ñan m̦õñã, im wũt ko raiboojoj. Tokãlik, Jeova ear kõm̦anm̦ane aolep menninmour ko, ko rej ekkãke, ko ilo lo̦jet, im ko rej tõbalbal. Ear kõm̦m̦an menninmour ko reddik ãinwõt kuuj ko, im menninmour ko rekkillep ãinwõt el̦bõn ko. Ta menninmour eo em̦m̦antata ippam̦?

Innem Jeova ear ba ñan enjel̦ eo m̦oktata: “Jen kõm̦anm̦an armej.” Armej ro renaaj oktak jãn menninmour ko. Elõñ men ko remaroñ make kine ak kõm̦m̦ani. Remaroñ bar kõnnaan, ettõñ, im jar. Im renaaj kar  kõjparok lal̦ in im lale menninmour ko ie. Kwõjel̦ã ke etan armej eo jinointata? Eokwe jen lale.