ToTeotsij Jehová techchijchijki. Ya nojkia kichijchijki nochi tlamantli tlen tikitaj uan tlen amo tikitaj. Kema ayamo kichijchijtoya tlamantli tlen tikitaj, kinchijchijki miakej iluikaeuanij. ¿Tijmati ajkia elij iluikaeuanij? Inijuantij kitekipanouaj Jehová uan elij kej ya. Tojuantij amo ueli tikitaj toTeotsij uan iluikaeuanij nojkia amo ueli tikinitaj. Nopa achtoui iluikaejketl katli Jehová kichijchijki kipaleuik kema kinchijchijki sitlalimej, planetas uan sekinok tlamantli. Se tlen nopa planetas eli Tlaltipaktli, kampa tojuantij tiitstokej.

Teipa, Jehová kikualtlalik Tlaltipaktli, kiampa ueliskiaj itstosej tlapialmej uan maseualmej. Kichijchijki tonati ma tlaui ipan Tlaltipaktli. Nojkia kinchijchijki tepemej, ueyatl uan ueyi atl.

¿Tijmati tlake panok teipa? Jehová kiijtok: “Nijchiuas ma ixua xiuitl, xochitl uan kuatinij”. Uajka pejki onka miak tlamantli tlen tijkuaskiaj uan nojkia ixuak xochitl. Jehová nojkia kinchijchijki sejse tlamantli tlapialmej: katli patlanij, katli nemij atitla uan katli mouauatatsaj. Kinchijchijki uejueyij tlapialmej, kej elefantes uan katli amo tlauel uejueyij, kej kuatochimej. ¿Tlake tlapiali tlauel mitspaktia?

Teipa, Jehová kiiljuik nopa achtoui iluikaejketl: “Nama ma tijchijchiuakaj se tlakatl”. Maseualmej amo eliskiaj sanse kej tlapialmej, pampa maseualmej ueliskiaj kamanaltisej, uetskasej, momaijtosej uan kichiuasej yajyankuik tlamantli. Nojkia  kinmokuitlauiskiaj tlapialmej uan Tlaltipaktli. ¿Tijmati ajkia elki nopa achtoui tlakatl? Ma tikitakaj.