Lowalangi Yehowa yaʼia Zamazökhi yaʼita. Ifazökhi fefu hadia ia, he soroma hegöi si lö oroma. Fatua lö ifazökhi fefu zoroma, oya ifazökhi ndra malaʼika. Hadia öʼila malaʼika? Malaʼika yaʼia daʼö si fakhili khö Yehowa. Lö oroma malaʼika, simane Lowalangi. Malaʼika si oföna ifazökhi Yehowa tobali sanolo yaʼia. Malaʼika daʼö zanolo Yehowa ba wamazökhi döfi, planet, hegöi tanö böʼönia fefu. Sambua moroi ba planet yaʼia daʼö ulidanö, nahia si sökhi si toröi yaʼita.

Aefa daʼö, ifaʼanö gulidanö Yehowa enaʼö tola tobali nahia niha hegöi urifö. Ifazökhi luo sohagaini ulidanö. Ifazökhi hili, asi, hegöi ungo nidanö.

Hadia zalua aefa daʼö? Imane Yehowa, ’Daʼufazökhi ndruʼu, sinanö, hegöi eu.’ Ibörötaigö oya ngawalö mbua geu, sayu, hegöi bunga si tumbu ba danö. Aefa daʼö, oya gurifö ifazökhi Yehowa, he urifö sihombo, sauri ba nidanö, hegöi sanana-nana. Ifazökhi gurifö side-ide, simane kelinci, hegöi urifö segebua simane gaza. Hadia gurifö sabölö omasiʼö?

Aefa daʼö, imane Yehowa khö malaʼika siföföna ifazökhi andrö, ”Datafazökhi niha.” Faböʼö niha moroi ba gurifö. Niha, tola lafazökhi hadia ia. Tola fahuhuo, maʼiki, ba mangandrö. Yaʼira zondrorogö ulidanö hegöi urifö. Hadia öʼila haniha niha siföföna? Dataʼalui.