Jiihóvah éí Ánihiilaii nilı̨́. Tʼáá ałtsoní áyiilaa, daatʼíinii índa doo daatʼíinii. Níłchʼigo naalʼaʼí doo daatʼíinii ląʼí áyiilaa. Éí háí ádaatʼı̨́? Diyin God éí níłchʼigo ndaalʼaʼí tʼáá beedaałtʼéego áyiilaa, éí doo deiitʼı̨́į da. Jiihóvah tsʼídá áłtsé níłchʼigo naalʼaʼí áyiilaaígíí éí bíká análwoʼí silı̨́ı̨́ʼ. Éí bíká análwoʼgo sǫʼ, yá biiʼ sinilígíí, índa tʼáá ałtsoní haidiilaa. Yá biiʼ sinilígíí éí łaʼ nizhóní léiʼ bikááʼ kééhwiitʼı̨́, éí nahasdzáán átʼé.

Jiihóvah éí bílaʼashdlaʼii índa tʼáá ałtso nahasdzáán bikááʼ hináa dooleełii yá hashtʼehoolaa. Jóhonaaʼéí bee adinídíingo áyiilaa. Dził, tónteel, áádóó tooh danílı̨́įgo ádayiilaa.

Áádóó Jiihóvah ánáádooʼniid: ‘Tłʼoh, chʼil, áádóó tsin ałʼąą ádaatʼéii ádeeshłííł.’ Bitsʼą́ą́dóó éí chʼil daalkanii, daadáanii, índa chʼilátah hózhóón ałtaasʼéí dahazlı̨́ı̨́ʼ. Jiihóvah nahasdzáán bikáaʼgi tʼáá ałtso nidaatʼaʼii, ndaʼałkǫ́ǫʼii, nidaaldlooshii, áádóó nidaaʼnaʼii ádayiilaa. Gah ádaníłtsooígíí dóó chı̨́ı̨́h yee adilohii ayóó ádaatʼéejįʼ ádayiilaa. Nishąʼ éí háiidiiígíí nił nizhóní?

Áłtsé níłchʼigo naalʼaʼí áyiilaa yę́ę ání: ‘Diné tʼáá nihináłtʼéego ádiilnííł.’ Diné éí naaldlooshii doo yił aheełtʼée da. Diné éí tʼáadoo leʼé ádeileʼ. Yádaałtiʼ, dloh danízin, índa sodadilzin doo. Nahasdzáán dóó naaldlooshii baa áhojilyą́ą doo. Áłtsé hastiin  ályaa yę́ęísh bééhonísin? Éí nihił bééhodoozįįł.