EISHOMO 1
Ruhanga Okuhanga Eiguru n’Ensi
Yehova Ruhanga n’Omuhangi waitu. Akahanga ebintu byona, ebi turikubaasa kureeba n’ebi tutarikureeba. Atakahangire ebintu ebi turikubaasa kureeba, akahanga baamaraika baingi munonga. Baamaraika noobamanya? N’abaheereza ba Yehova. Bari nka Yehova. Titurikubaasa kubareeba, nk’oku tutarikubaasa kureeba Ruhanga. Maraika ou Yehova yaabandiize kuhanga, akaba omuhwezi we. Maraika ogwo akahwera Yehova kuhanga enyonyoozi, n’ebindi bintu bingi. Kimwe aha bintu ebyo n’ensi, eka yaitu nungi.
Kandi Yehova akatebeekanisa ensi kutuurwamu enyamaishwa n’abantu. Akahanga eizooba kutujwisiza omushana omu nsi. Akahanga enshozi, enyanja empango, n’emigyera.
Niki ekyakuratsireho? Yehova akagira ati: ‘Niinza kuhanga obunyaatsi, ebimera n’emiti.’ Ebijuma by’emiringo mingi ebitarikushushana, emboga, n’ebimuri bikatandika kumera. Bwanyima Yehova akahanga enyamaishwa z’emiringo yoona—ezirikuguruka, ezirikugyendesa enda n’ezirikwekurura ahansi. Akahanga enyamaishwa enkye nk’obume, n’enyamaishwa empango nk’enjojo. Iwe nookunda nyamaishwa ki?
Yehova akagambira maraika ou yaabandize kuhanga ati: “Ka tuhangye omuntu.” Abantu bakaba nibaija kuba ab’omutaano aha nyamaishwa. Bakaba nibabaasa kukora ebintu. Bakaba nibabaasa kugamba, basheka, kandi bashaba. Bakaba nibaza kureeberera ensi n’enyamaishwa. Omuntu ou Yehova yaabandize kuhanga noomumanya? Ka tureebe.
“Omu kutandika Ruhanga akahanga eiguru n’ensi.”—Okutandika 1:1
Noobaasa Kukunda n'Ebi
ENYEGYESA ZA BAIBULI ENKURU
Ahabw’enki Ruhanga Yaahangire Ensi?
Ensi erimu ebihangirwe ebirikushemeza. Ensi eri omu mwanya oguhikire kuruga aha eizooba, kandi neeyetoororerera aha rugyero ruhikire n’omu bwire obuhikire. Ahabw’enki Ruhanga yaahangire ensi omu muringo ogwo?
