Jehova Osolobrugwẹ yọ maren ọwan. Ọye yọ ma i kemru kemru, ekwakwa ra mẹrẹn ọrhẹ ekwakwa re vwe rhiẹromẹrẹn. Ọ ma emakashe buebun, ọ ki ma ekwakwa ra mẹrẹn. Wu rhe aruo ihworho emakashe i havwọ? Emakashe ihworho ri họhọ i Jehova. A vwa sabu mẹrẹn aye-e, jerẹ oborẹ a vwa sabu mẹrẹn Osolobrugwẹ. Ọmakashe ọrukaro ri Jehova ọ maren, yọ ha userhumu riẹn. Ọmakashe ọrana, ọ ha userhumu rẹn i Jehova ọke rọ ma ikereti na, otọrakpọ na, idjuwu na, kugbe ekwakwa ephian. Ọye yọ ma otọrakpọ orhorhomu ọnana rẹ ọwan e rhirhiẹ na.

Ọke oru, Jehova nọ kwaphiẹ akpọ na rhọ neneyo ituakpọ ọrhẹ eranmo i sabu rhirhiẹ ye. Jehova no ru ọren na, no lo mwu akpọ na. Ọ ma igbenu, irhie eduado, ọrhẹ ekokamo.

O ji ru emru ọrọrọ? Ee, Jehova nọ tare: ‘Mi ne ruie nẹ odin, emamọ ọrhẹ erhan i homaphia.’ Emamọ, odin, ọrhẹ idodo sansan ni homaphia. Jehova nọ ma eranmo na ephian​—⁠eranmo ra dan, era rhẹnrhẹn, ere kpolo, ọrhẹ eranmo ra ranran. Ọ ma eranmo ekokamo, jerẹ afiotọ, ọrhẹ eranmo ri doro omamọ jerẹ eni. Aranmo ọgo yọ mai jo?

Jehova nọ ta rẹn ọmakashe ọrukaro na: “Jenẹ a ma onyakpọ.” Ituakpọ ina vẹnẹ eranmo. Aye ina sabu ruẹ ekwakwa ekpokpọ. Aye ina sabu tẹmro, chẹẹ, jeghwai nẹrhomo. Aye ina hẹrote otọrakpọ na ọrhẹ eranmo  na. Wu rhe ọhworhare ọrukaro rẹ Osolobrugwẹ ọ maren? Jene yono kpahiẹn.