Are ri Jehová Dios ri bʼanal qe. Areʼ xubʼan ronojel ri jastaq che kqilo, xuqujeʼ ri kqil taj. Are chiʼ majaʼ kubʼan ri jastaq che kqilo, areʼ xeʼubʼan kʼi ángeles. ¿La awetaʼm e jachin riʼ ri ángeles? E areʼ e winaq che xeʼubʼan ri Jehová xuqujeʼ kejunamataj rukʼ areʼ. Oj kojkun taj kqil ri Jehová xuqujeʼ kojkun taj keqil ri ángeles. Ri nabʼe ángel xubʼan ri Jehová xux toʼl re. Areʼ xutoʼ ri Jehová che kibʼanik ri e chʼumil, ri e planetas xuqujeʼ ri nikʼaj chik jastaq. Oj, oj kʼo pa jun chke ri planetas, are ri jeʼlalaj uwach Ulew.

Tekʼuriʼ, Jehová xubʼan ri uwach Ulew rech ri e chikop xuqujeʼ ri e winaq kekunik kekʼasiʼ chuwach. Xubʼano che ri usaqil ri qʼij kkaʼy cho ri uwach Ulew. Xuqujeʼ xeʼubʼan ri e juyubʼ, ri mar xuqujeʼ ri e nimaʼ.

¿Jas chi xkʼulmatajik? Jehová xubʼij: «Kinbʼan ri qʼayes xuqujeʼ ri e cheʼ». Rukʼ wariʼ cho ri uwach Ulew xumaj ukʼiyik jalajoj uwach cheʼ, ichaj xuqujeʼ kotzʼiʼj. Jehová xuqujeʼ xeʼubʼan jalajoj kiwach chikop: ri kerapanik, ri kemuxanik xuqujeʼ ri kkijururej kibʼ. Xeʼubʼan alaj taq chikop, junam rukʼ ri imul, xuqujeʼ e nimaʼq, junam kukʼ ri elefantes. ¿Jas chikop utz kawilo?

Tekʼuriʼ, Jehová xubʼij che ri nabʼe ángel: «Chqabʼanaʼ ri winaq». Ri e winaq kejunamataj ta riʼ kukʼ ri e chikop. Kekunik kkibʼan jastaq, kechʼawik, ketzeʼnik xuqujeʼ kkibʼan kichʼawem che ri Dios. Kkichajij ri  uwach Ulew xuqujeʼ ri e chikop. ¿La awetaʼm jachin ri nabʼe achi? Chqilaʼ.