Jehová Diosmi tucuita rurarca. Paimi ñahuihuan ricui tucushcacunatapish mana ricui tucushcacunatapish rurarca. Imata manaraj rurashpami achca angelcunata rurarca. ¿Angelcunaca picunataj can? Diosta sirvijcunami can. Ima shinami Diosta mana ricui tucunchij chashnallatajmi angelcunatapish mana ricui tucunchij. Dios rurashca punta angelca luzerocunata, planetacunata, imalla tiyashcacunatapish rurashpami Diosta ayudarca. Ñucanchijca planeta Tierra nishcapimi causanchij.

Chai qꞌuipaca animalcuna, gentecunapish cushilla causachunmi Diosca cai allpataca sumajta allichirca. Chashnallataj cai allpata achijyachichunmi intita rurarca. Urcucunata, mama cuchata, riocunatapishmi rurarca.

¿Imatataj ashtahuan rurarca? Diosca, ‘qꞌuihuapish yuracunapish huiñachun’ nircami. Chaimantami allpapica tucui laya frutacuna, verdijlla qꞌuihuacuna, sisacuna tiyai callarirca. Shinallataj huairapi purijcunata, llucashpa purijcunata, yacupi causaj animalcunatami rurarca. Conejo laya uchilla animalcunata, elefante laya jatun animalcunatapishmi rurarca. ¿Maijan animalitotataj ashtahuan munangui?

Diosca punta angeltaca, ‘ñucanchijman rijchaj runata rurashun’ nircami. Chaimantami ñucanchijca mana animalcuna shina canchij.  Ashtahuanpish yuyanata, rimanata, asinata, Diosta mañanatami pudinchij. Cai allpatapish animalcunatapish cuidai tucunchijmi. ¿Pitaj punta runaca cashcanga? Ricushun.