1 KAQ YACHACHIKUY
Hanaq pachatawan allpa pachata Dios unanchasqanmanta
Jehova Diosmi unanchawarqanchik. Paymi unancharqa rikusqanchikkunata chaynataq mana rikusqanchikkunatapas. Rikusqanchik kaqkunata manaraq ruwachkaspanqa, achka-achka angelkunatam unancharqa. Angelkunaqa Diospa unanchasqan churinkunam, hinaspapas Dios hina mana rikunam kanku. Diospa unanchasqan punta angelqa yanapaqninmi karqa, paymi tukuy imata ruwaysirqa. Jehova Diosmi allpa pachanchikta suma-sumaqta ruwapuwarqanchik.
Kay allpa pachatam sumaqyachirqa animalkunapas chaynataq runakunapas yachananchikpaq. Chaymi ruwarqa lamar quchata, urqukunata chaynataq mayukunatapas, ruwarqataqmi intitapas achkiwananchikpaq.
¿Imatawantaq unancharqa? Wiñachirqataqmi tukuy rikchaq sachakunata chaynataq waytakunatapas. Unancharqataqmi uchuy animalchakunatawan hatun animalkunatapas: Alton pawaqkunata, yaku ukupi kaqkunata chaynataq pampapi puriqkunatapas.
Chaymantañam Jehova Diosqa punta kaq runata unancharqa. Runakunawan animalkunaqa manam chaynallachu kanchik. Ñuqanchikqa atinchikmi imapas ruwayta, rimayta, asikuyta chaynataq Diosta mañakuytapas. Chaymi Diosqa runata unancharqa kay pachata huertayachinanpaq chaynataq animalkunatapas uywananpaq.
‘Tukuy imapa qallariyninpim cielokunata hinaspa kay pachata Dios unancharqa’ (Genesis 1:1).
Kaykunatapas leeykuy
BIBLIAPA ANCHA ALLIN YACHACHIKUYNINKUNA
¿Imapaqtaq Diosqa kay allpa pachata unancharqa?
Kay allpa pachanchikqa suma-sumaqmi. Intimantapas karuniqchanpim kachkan inti mana paqwayta ruparunanpaq, alliniqllamantataqmi muyunpas, sumaq takyachisqataqmi kachkanpas. ¿Imapaqtaq Diosqa kay pachanchikta suma-sumaqta unancharqa?
