Diosmi kamaqninchisqa, paymi tukuyta ruwaran. Manaraq ch’askakunata allpatapas ruwashaspanmi ruwaran askha angelkunata. ¿Imataq angelkunari? ¿Yachankichu? Paykunaqa Jehová Dios jina espiritukunan kanku, chaymi mana rikunchischu. Ñaupaq kaq ruwasqan angelmi Jesús karan. Paymi Diosta yanaparan imaymana ruwayta. Paywanmi Diosqa ruwaran ch’askakunata, planetakunata, jujkunatapas. Jujnin planeta ruwasqankupin noqanchisqa tiyanchis.

Chaymantan Diosqa allpanchista prepararan animalkunapas runakunapas chaypi tiyanankupaq. Chaypaqmi intita k’anchachimuran. Ruwallarantaqmi orqokunata, qochakunata, mayukunatapas.

Chay qhepamanri, ¿iman pasaran? Jehová Diosmi niran: “Ruwasaq qorakunata, plantakunata, sach’akunatapas”, nispa. Chaymi allpanchispi wiñamuyta qallariran imaymana clase frutakuna, verdurakuna, t’ikakunapas. Diosqa ruwallarantaqmi imaymana clase animalkunata: altonta volaqkunata, unupi nadaqkunata, pampanta suchuqkunatapas. Ruwaranmi juch’uy animalkunata jatun animalkunatapas. Qanmanri, ¿mayqen animaltaq gustasunki?

Chay qhepamanmi Diosqa ñaupaq kaq angelta niran: “Runata ruwasunchis”, nispa. Runakunaqa jujniraymi kanan karan animalkunamanta. Runakunaqa atinchismi inventayta, rimayta, asikuyta,  Diosmanta mañakuytapas. Runakunaqa cuidanankun karan allpatapas animalkunatapas. ¿Yachankichu pin ñaupaq kaq runa karan chayta? ¿Munawaqchu yachayta?